bwiza.com
Ahabanza » Burundi: Abanyeshuri batandatu bari muri gereza bashinjwa konona ifoto ya Perezida Nkurunziza
Amakuru Politiki

Burundi: Abanyeshuri batandatu bari muri gereza bashinjwa konona ifoto ya Perezida Nkurunziza

Abanyeshuri batandatu bari mu kigero cy’imyaka 13 na 16, ubu bari mu maboko y’ubutabera, bashinjwa konona ifoto y’umukuru w’igihugu cy’u Burundi, Pierre Nkurunziza, iri mu gitabo bigiramo.

Aba banyeshuri batawe muri yombi ku mugoroba wo ku wa Kabiri tariki ya 12 Werurwe 2019, ku kigo cy’amashuri abanza cy’Akamuri  giherereye muri Komini Kirundo.

Ababyeyi b’aba bana batangarije VOA ko ikibazo cy’aba bana cyatangiye kuvugwa ku wa Gatanu w’icyumweru gishize, batabwa muri yombi ku wa Kabiri w’iki cyumweru, ubu bakaba bari mu maboko y’ubutabera, muri kasho y’i Kirundo.

Umwe muri aba babyeyi yagize ati “Ngo bari bafite ibitabo bakoresha, ngo byari bishaje, bababwiye ko bononnye ifoto y’umukuru w’igihugu, mugabo abana twarababajije baraduhakanira”.

Undi mubyeyi w’umugore na we ati “Bavuze ko banditse amazina ku matwi y’umukuru w’igihugu, turababaza niba ababikoze babazi, bati ‘reka reka ntabwo tubazi’, kubera ko babihawe byarakoreshejwe bavuga ko batazi niba barabibahaye iyo foto yarononwe cyangwa niba hari abandi babikoze”.

Amakuru ava kuri iri shuri abana bigaho, avuga ko umwe mu bana baryigaho yatangarije abarimu ko bagenzi be bamwononeye igitabo, bucyeye ngo nibwo basuzumye ibitabo basanga ifoto y’umukuru w’igihugu iri mu bitabo bitanu muri kimwe mu byigwa yarononwe. N’umuyobozi ushinzwe uburezi mu Ntara ya Kirundo ngo yarahageze, byanzurwa ko abo bana bashyikirizwa ubutabera.

Ababyeyi barasaba ko hakorwa iperereza ryimbitse kugira ngo abana babo bataharenganira dore ko bavuga ko bakiri bato. “Turasaba ubutabera gukurikirana ikibazo neza, kuko abo bana bafite imyaka ingana uko ni batoya cyane, ntibaramenya iyo biva niyo bijya, ntibaramenya gukina politiki, kandi natwe turi abakirisito ntabwo twijandika muri politiki,….”.

Mu mwaka wa 2016, nabwo ifoto ya Perezida Nkurunziza yanditsweho n’abanyeshuri, bamutuka dore ko yari amaze kwiyamamaza kuri manda ya Gatatu abarundi bose batavugagaho rumwe.

Abanyeshuri bari bagiye bashwaratura mu bitabo by’isomo ry’ubumenyamuntu, muri ibyo bitabo hakaba ubusanzwe harimo ifoto ya Perezida Nkurunziza n’iz’abami babiri bayoboye u Burundi ; Mwezi Gisabo na Mwambutsa IV Bangiricenge.

Bashwaratuye mu ifoto ya Nkurunziza, banamushyira umusaraba mu gahanga, bamwandikaho n’amagambo y’urwango. Nk’uko bigaragara, umwe yagize ati : “Intumva Nkurunziza, Nkurumbi… Manda ya 3…”. icyo gihe bamwe barirukanwe abandi barafungwa.

Ifoto ya Perezida Nkurunziza abanyeshuri bashwaratuyemo mu 2016 (IFOTO/Internet)

Izindi wakunda

Bwiza.com