bwiza.com
Ahabanza » Kimihurura: Inkongi y’umuriro yahitanye umukobwa w’imyaka 19
Amakuru Politiki

Kimihurura: Inkongi y’umuriro yahitanye umukobwa w’imyaka 19

Polisi y’u Rwanda iratangaza ko kuri uyu wa kabiri ushize umuntu umwe yishwe n’inkongi y’umuriro ahiriye mu nzu saa munani z’ijoro mu Murenge wa Kimihurura nk’uko byemezwa n’umuvugizi wa polisi mu Mujyi wa Kigali.

CIP Marie Goretti Umutesi aratangaza ko iyo nkongi y’umuriro bikekwa ko yatewe n’amarangi bapuriza ku nzu yari ari mu gikoni.

Uwapfuye azize iyi mpanuka ni umukobwa w’imyaka 19 y’amavuko witwa Rose Mutamuriza, wari umukozi wo mu rugo.

CIP Umutesi yashimiye abaturage b’Umurenge wa Rugando, mu Mudugudu wa Gasange bagerageje kuzimya inkongi polisi itarahagera.

Nk’uko byemezwa n’ababibonye, ngo uyu muriro watewe n’ibintu byari ku ziko byatinzeho bikekwa ko ari ipanu yaje gushyuha bikabije bikagera kuri bintu bibujijwe kwegera umuriro.

CIP Umutesi ati: “Ipanu yari yashyushye birenze yateye umuriro byoroshye niba umuntu watekaga yarangaye agasiga ibyo yari atetse bikaza kugera ku bintu byoroshye gushya.”

Yaboneyeho kuburira  abaturage abasaba kwirinda gukoresha umuriro nta bwitonzi burimo kandi bakirinda kwegereza umuriro ibintu byoroha gufatwa n’inkongi.

Yanasabye abaturage kujya iteka bitabaza umutwe wa polisi ushinzwe kurwanya inkongi mu gihe hadutse inkongi kugirango batabare byihuse.

Ni muri urwo rwego hatanzwe numero za telephone ushobora kwitabaza mu gihe iki kibazo kivutse. 111 wayihamagaraho ku buntu, mu gihe ushobora no guhamagara kuri telephone ngendanwa kuri 0788311120 na 0788311224.

 

 

Izindi wakunda

Bwiza.com
error: Ntibyemewe