bwiza.com
Ahabanza » Perezida Tshisekedi yaba aje gusaba Kagame kuvuguta umuti! 
Amakuru Politiki

Perezida Tshisekedi yaba aje gusaba Kagame kuvuguta umuti! 

Hashize imyaka isaga 20, uburasirazuba bwa Repubulika iharanira Demokarasi ya Congo bwibasiwe n’ intambara z’ uruduca ziterwa n’ imitwe yitwara gisirikare ibyo bigatuma U Rwanda rutungwa agatoki kuba nyirabayazana.

U Rwanda rwatangiye gushyirwa mu majwi mu mpera z’ umwaka wa 1996 ubwo ingabo zarwo zateraga iki gihugu zigamije guhangana n’ ingabo za FAR ndetse n’ Interahamwe zari zahungiye mu Burasirazuba bwa Congo-Kinshasa.

Muri icyo gihe, ingabo za RPA zabashije gusenya ibirindiro bikomeye byari bikikijwe n’ inkambi z’ impunzi mu duce twa Gashyusha, Mugunga , Gatare, Tingitingi n’ ahandi.

Aha nubwo  Leta y’ U Rwanda yakomeje guhakana ko nta ngabo rufite muri Congo rwakomeje kotswa igitutu n’ umuryango mpuzamahanga kugeza igihe rwiyemeje kuvana ingabo zarwo muri iki gihugu.

Nyuma y’ igihe kitari kinini haje kuvuka umutwe wa M23 ufitanye isano ryo hafi na CNDP ya Gen. Laurent Nkunda nayo ikomoka kuri   RCD yaje kubyara AFDL ya Laurent Kabila yahiritse ingoma ya Mobutu.

Impinduramatwara yabaye muri Congo-Kinshasa hagati ya 1996 na 1997 yagiye ivugwamo ndetse inagaragaramo U Rwanda bitewe ni uko harimo Abanyekongo bavuga ururimi rw’ ikinyarwanda.

Ayo  mateka ubwabyo yari impamvu ikomeye yagombaga gutuma U Rwanda rujya muri iyo ntambara yarwanye n’ ibihugu byinshi byashakaga inyungu z’ ubukungu bushingiye ku mabuye y’ agaciro ari muri Congo-Kinshasa.

Perezida Tshisekedi asaba Kagame kuvuguta umuti! 

Urugendo Umuyobozi w’ Ibiro bya Perezida wa Congo-Kinshasa, Vital Kamerhe aherutse kugirira i Kigali kuwa 11 Werurwe 2019 rufite ibisobanuro byinshi ku kibazo cy’ umutekano mucye ukomeje kurangwa muri Kivu zombi.

Mu butumwa bwa Félix Antoine Tshisekedi, Kamerhe yashyikirije Perezida Paul Kagame, yamusabye ubufatanye mu kugarura amahoro mu Burasirazuba bwa Congo.

Muri urwo rwego, Perezida wa Congo-Kinshasa , Felix Tshisekedi ateganya kuzasura mugenzi w’ u Rwanda Paul Kagame kugira ngo barebere hamwe uburyo bavuguta umuti mu gukemura ikibazo cy’ umutekano muke giterwa n’ imitwe yitwara gisirikare.

Uburasirazuba bwa DRC indiri y’ inyeshyamba

Kuva aho jenoside yakorewe Abatutsi yaba muri 1994 abasize bahekuye U Rwanda bagahungira mu mashyamba bagamije kongera gutera imitwe yitwara gisirikare yakomeje kugwira mu gace k’ uburasirazuba bwa Congo-Kinshasa.

Mu rwego rwo gushaka kwirinda bitewe n’ intege nke z’ ingabo za Leta ya Congo-Kinshasa (FARDC) imiryango yisuganyije mu moko ireme imitwe myinshi ya Mayi- Mayi iharanira kwirinda abarwanyi ba FDLR bakomeje kurangwa n’ ibikorwa bibi byiganjemo ubusahuzi ndetse n’ ubwicanyi.

 

Gaston Rwaka/Bwiza.com

Izindi wakunda

Bwiza.com
error: Ntibyemewe