bwiza.com
Amakuru Iterambere ry'umuryango

Rusizi: Abagabo banengwa gukwepa inshingano z’urugo

Abagore bo mu Murenge wa Bugarama, Akarere ka Rusizi, Intara y’Iburengerazuba, bashinja abagabo babo gukwepa inshingano, bagata ingo zabo bakajya gushaka abandi bagore.

Abagore bavuga ko ikibazo gihari ahanini gishingiye ku guharike. Ngo biragoye kubona umugabo ushobora kubana n’umugore we imyaka irenze itanu. Bamwe bamara kubona abana babaye benshi bakabatana na nyina bakajya kwishakira abandi bagore.

Abagore batawe n’abagabo bavuga ko babayeho mu buzima bukakaye, uyu ni uwitwa Alphonsine uturiye ikibaya cya Bugarama, umugabo we yamutanye abana batandatu, ashaka undi mugore na we bamaze kubyarana umunani.

Ati “Dufitanye batandatu, undi ni umunani, ubuyobozi bushobora kumufata akabyemera [kwita ku bana be] ariko ntabikore, ubura uko ubigenza ukagumana nabo mu nzu, ukabagaburira, ukabambika,…”.

Iki kibazo cyo guharikwa agisangiye n’abandi, uyu ati “Hano mu Bugarama nta mugabo utunga umugore umwe, nta mugabo uzi guhahira umugore, umugore aca ukwe n’umugabo agaca ukwe ahubwo bagahura amukubita”.

‘Hano mu Bugarama nta mugabo mushobora kubyarana gatanu cyangwa gatandatu ataraguta mu nzu ngo agende”. “Iyo mubyaranye abana 10 arareba akavuga ati ‘uyu ntabwo akiri umugore ahubwo reka nishakire undi’ ubwo agafata wa mutungo mwashakanye akawujyana ahandi”. Ibi ni ibikomeza kuvugwa n’abagore batuye muri aka gace.

Abagabo nabo bashinja aba bagore kutabubaha ahanini ngo bitwaje ihame ry’uburinganire, uyu ati “Hari ijambo bita ‘Uburinganire’ abagore bakoresheje nabi,… nuvuga gatoya barazana ubuyobozi bakujyane, umugabo utihangana ahita anyura muri iyo nzira yo guharika”.

Bakomeza bavuga ko abagabo benshi babona ingo zabo zirimo imibereho mibi bakazivamo bakajya ku bandi babonaho ubushobozi ariko ngo n’ubundi biba iby’ubusa kuko naho iyo babonye ubukene bwageze mu rugo narwo baruvamo.

Umuyobozi wungirije w’Akarere ushinzwe imibereho myiza y’Abaturage mu karere ka Rusizi, Nsigaye Emmanuel, avuga ko bafatanya n’izindi nzego z’ubuyobozi mu guhangana n’iki kibazo.

Ati “Nkatwe nk’ubuyobozi dufite inshingano zo kurengera umuryango, ntabwo tugomba gukomeza kwemera ko iyo miryango ibaho, icyo tugikoranaho n’abanyamabanga nshingwabikorwa b’Imirenge n’abayobozi kugera ku Mudugudu ko tutemera abantu nk’abo ngabo baza gusenya imiryango yari yubatse kandi itarigeze itandukana”.

Uretse ingaruka z’imibereho mibi y’imiryango, ubuharike burimo no kongera ibibazo by’amakimbirane yo mu ngo ndetse n’ubwiyongere bukabije bw’abaturage.

Izindi wakunda

Bwiza.com