bwiza.com
Ahabanza » Tshisekedi yashyize umukono ku cyemezo cyo kurekura imfungwa za politiki 700
Amakuru Politiki

Tshisekedi yashyize umukono ku cyemezo cyo kurekura imfungwa za politiki 700

Perezida Felix Tshisekedi wa Repubulika iharanira Demokarasi ya Congo, yamaze gusinya icyemezo cyo kurekura imfungwa za politiki n’ibitekerezo byazo. Ni icyemezo cyasomewe kuri televiziyo za leta kuri uyu wa Gatatu, itariki 13 Werurwe ndetse umuyobozi wa cabinet y’umukuru w’igihugu agira icyo akivugaho.

Firmin Yangambi na Franck Diongo ni bamwe mu mfungwa z’ingenzi za politiki zirebwa n’iki cyemezo abatavuga rumwe n’ubutegetsi bakomeje gusaba ifungurwa ryabo kuva mu 2016. Umuyobozi wa cabinet wa Perezida Tshisekedi, Vital Kamerhe, akaba yemeza ko imfungwa 700 hirya no hino mu gihugu zirebwa n’iki cyemezo nk’uko iyi nkuru dukesha RFI ikomeza ivuga.

Hari irindi zina rya gatatu ryari riri ku rutonde rya Eugene Diomi Ndongala, Perezida w’ishyaka Démocratie chrétienne, ryakoranaga bya hafi na nyakwigendera Etienne Tshisekedi. Uyu we nta mbabazi za perezida yahawe nubwo byasabwaga n’Inama y’Igihugu ishinzwe gukurikirana ishyirwa mu bikorwa ry’amasezerano ya politiki (CNSA) ya Saint Sylvestre.

Vital Kamerhe akaba yasobanuye ko hari ibikiri kwigwaho ku kibazo cye. Minisitiri w’ubutabera, Alexis Thambwe Mwamba akaba ari we biteganyijwe ko kuri uyu wa kane asinya iteka ryo gufungura by’agateganyo uyu mugabo umaze gukora ¾ by’igifungo yahawe. Ibi ariko ntibyanyuze abo ku ruhande rwa Diomi Dongala rwemeza ko kuterekurwa ari  ingaruka z’amasezerano Tshisekedi yagiranye na Kabila.

Ku rundi ruhande, Kamerhe yahamagariye umuntu wese waba ufite uwo mu muryango we watawe muri yombi hagati y’itariki ya 01 Mutarama 2015 n’itariki 31 Ukuboza 2018 kubivuga. Yaboneyeho no kwizeza ko imfungwa zose zafashwe ku mpamvu za politiki zizarekurwa.

 

Izindi wakunda

Bwiza.com