bwiza.com
Ahabanza » Uburwayi bw’Ibibembe bukomeje gufata indi ntera mu Burundi
Amakuru Ubuzima

Uburwayi bw’Ibibembe bukomeje gufata indi ntera mu Burundi

Buri mwaka abarundi 400 bafatwa n’indwara y’ibibembe (La lèpre) mu gihugu cy’u Burundi. Abagera kuri 80 bikabaviramo kwangirika kw’isura.

Mu mwaka wa 2018, abantu 385 nibwo bagaragayeho ubu burwayi bw’ibibembe, mu gihe mu mwaka wa 2017, bwari bwagaragaye ku bantu 400.

Nk’uko bitangazwa n’ikinyamakuru Iwacu/Burundi, ngo Intara za Rutana, Makamba, Rumonge, Cibitoke na Bubanza, zituranye na Tanzania ndetse na RDC nizo zigaragaramo cyane abantu barwaye ubu burwayi.

Dr Ntibarufata uhagarariye ishami rishinzwe kurwanya ibibembe n’igituntu, avuga ko abarundi benshi batajya babasha gusobanukirwa n’ibimenyetso biranga iyi ndwara, bikabaviramo kuzahazwa nayo. Ati “Ntabwo bita ku bimenyetso by’iyi ndwara”.

Tariki ya 31 Mutarama buri mwaka isi yose izirikana abarwayi b’ibibembe.  Abashakashatsi bavuga ko amateka y’indwara y’ibibembe ababaje kandi anateye agahinda kuko atari indwara ya vuba aha.

Ni indwara ya mbere y’izuka rya Yesu izwi neza n’Abanyamisiri ba kera, abashinwa ba kera ndetse N’abahinde b’icyo gihe. Ni indwara ivugwa cyane muri Bibiliya. Iyi ndwara yabanje guhitana inasigira ubumuga abatari bake ku isi. Gusa nyuma y’aho umuganga Hansen ayivumburiye akerekana n’agakoko kayitera kitwa Bacille de Hansein, yaje kugabanya ubukana yari ifite.

Abanyarwanda bamwe ntibayifata nk’indwara yandura, ahubwo bavuga ko ari amarozi. Ikindi kandi abayizi ntabwo bakiyumva nk’indwara ifite ubukana nk’ubwo yahoranye kuko hari uduce usanga bayibana bakayitiranya n’izindi ndwara z’uruhu, abandi bakumva ko nta kibazo.

Imibare y’abayirwaye yerekana ko indwara y’ibibembe igenda igabanuka, kuko mu Rwanda abarwayi b’ibibembe bavuye ku 1.800 mu mwaka wa 1984 na mbere yaho, ibarura ryakozwe mu 2012 ryerekanye abarwayi bagera 50 gusa.

Imibare igaragazwa na RBC yerekana ko mu mwaka wa 2015 mu Rwanda habarurwaga abantu 40 bagaragaweho n’iyo ndwara ariko kugeza mu mpera z’umwaka ushize habarurwaga 30 gusa

Ibibembe ni indwara yandura, si n’indwara y’umuryango ntabwo ari amarozi, nta n’ubwo ari indwara y’amateka nka mburugu n’ubushita nk’uko bamwe babyibaza, kuko abayirwaye na nubu bakiboneka mu bice bitandukanye by’isi.

Ihutire kujya kwa muganga igihe ubonye bimwe muri ibi bimenyetso. Amabara ataryaryata yeruruka ku mubiri, uduturugunyu ku mubiri, kubyimba imyakura imwe n’imwe ndetse n’ibisebe bitababaza mu birenge”.

 

Izindi wakunda

Bwiza.com
error: Ntibyemewe