bwiza.com
Ahabanza » UCL: Liverpool isezereye Bayern mu gihe Barcelona yanyagiraga Lyon.
Amakuru Imikino

UCL: Liverpool isezereye Bayern mu gihe Barcelona yanyagiraga Lyon.

Mu mikino ya 1/8 ya UEFA Champions League yabaye kuri uyu wa 13 Werurwe, Liverpool isezereye Bayern Munich mu gihe FC Barcelona yatsindaga Olympique Lyonnais imvura y’ibitego.

Aya makipe yose yanganyije ubusa ku busa mu mikino yabanje, yari yateje urujijo ku bakunzi b’umupira w’amaguru; aho hibazwaga ku makipe arakomeza. Amahirwe yari ari ku makipe yakiniye hanze iyo aza kunganya ibitego ibyo ari byo byose. Bayern Munich yari yakiriye Liverpool ku kibuga cyayo, Allianz Alena, mu gihe Barcelona yakiraga Lyon kuri Camp Nou.

Uku ni ko imikino yombi yagenze duhereye ku wa Bayern Munich vs Liverpool:

Amakipe yombi yatangiye asatirana ariko ku munota wa 26, umunya-Senegal, Sadio Mané aza kubonera Liverpool igitego cya mbere. Cyavuye ku mupira yahawe na Virgil Van Dijk.

Bayern yasatiriye Liverpool ishaka uburyo yakwishyura igitego yari utsinzwe. Imbere y’izamu rya Allison Becker, Jöel Matip yashatse kurenza umupira ariko ku bw’amahirwe make ugana mu izamu; Matip aba yitsinze ku munota wa 39. Icyakoze igitego kimwe ku makipe yombi cyari gihagije kugira ngo Liverpool ikomeze. Impamvu ni iy’igitego yari itsindiye hanze.

Igice cya kabiri cyabaye icya Liverpool. Iyi kipe yagaragaje umukino unoze biza kuyiha undi musaruro mwiza. Ku munota wa 69, myugariro Virgil Van Dijk yatsinze igitego cya kabiri cya Liverpool; ubwishingizi buriyongera.

Sadio Mane yitwaye neza muri uyu mukino.

Iyi kipe yo mu Bwongereza ntiyanyuzwe ahubwo yakomeje gusatira ngo igwize umubare w’ibitego. Ku munota wa 84, Sadio Mane yatsinze igitego cya gatatu cya Liverpool; kiba icya kabiri atsinze muri uyu mukino.

Abakinnyi nka Robert Lewandowski na James Rodriguez bagerageje gusatira Liverpool ngo barebe ko bacungura ikipe yabo ariko ntibyabahira. Uku ni ko uyu mukino warangiye.

Ku kibuga cya Barcelona, Camp Nou ho byari imvura y’ibitego.

FC Barcelona yatangiranye imbaraga cyane mu busatirizi no kwiharira umupira bimaze kuba ikirango cyayo, byayisabye iminota 18 kugira ngo Lionel Messi abone igitego. Iyi ni penaliti yateye nyuma y’uko Louis Suarez yari akorewe ikosa mu kibuga cy’umuzamu wa Lyon.

Ku munota wa 31, Philip Coutinho yabonye igitego cya kabiri ku munota wa 31. Iki gitego yagikuye ku mupira yari ahawe na Louis Suarez, na we ntiyamutenguha.

Mu gice cya kabiri cy’umukino, ibintu byahinduye isura kuko ku munota wa 58, Lyon yari imaze akanya isatira yabonye igitego cyatsinzwe na Lucas Tousart. Iki gitego cyatumye abakunzi ba FC Barcelona bagira ubwoba kuko iyo Lyon iza gutsinda ikindi; ikanganya na Barcelona, yari gukomereza ku bitego byo hanze.

Lionel Messi yaje gusubiza abakunzi ba FC Barcelona, ubwo yatsindaga igitego cya gatatu ku munota wa 78. Ibi byashimangiraga bidasubirwaho ko byanga byakunda Lyon igomba gusezererwa.

Messi yatsinze ibitego bibiri, atanga imipira ivamo ibitego ibiri.

Nyuma y’iminota itatu, Gerard Pique yerekanye ko ibitego batsinze bidahagije ubwo yatsindaga igitego cya kane ku munota wa 81.

Osman Dembele wasimbuye Philip Coutinho ku munota wa 70, ni we washyizeho agashyinguracumu ubwo yatsindaga igitego cya gatanu ku munota wa 86. Ngayo nguko! FC Barcelona itahana ibitego bitanu, mu gihe Lyon yabonye kimwe.

Ibitego bibiri Lionel Messi yatsinze byiyongereye kuri 6 yari amaze gutsinda muri uyu mwaka w’imikino ya UCL. Ku bitego 8, ubu ni we umaze gutsinda byinshi.

Nyuma y’iyi mikino ya 1/8, amakipe azakomeza muri ¼ ni Manchester United, FC Porto, Tottenham Hotspurs, Ajax Amsterdam, Juventus, Manchester City, Liverpool na FC Barcelona.

Izindi wakunda

Bwiza.com