bwiza.com
Ahabanza » Abanyapolitiki ntibagomba kwishisha ababasaba amakuru- Gasamagera Wellars
Amakuru Politiki

Abanyapolitiki ntibagomba kwishisha ababasaba amakuru- Gasamagera Wellars

Umuyobozi Mukuru w’Ikigo cy’Igihugu cy’amahugurwa mu by’imicungire y’abakozi n’umutungo (RMI), Gasamagera Wellars avuga ko abanyapolitiki badakwiye kwishisha abanyamakuru mu gihe babaka amakuru, ariko nabo ngo bakagombye gusaba amakuru y’ukuri.

Ibi yabitangaje kuri uyu wa Gatanu tariki ya 15 Werurwe 2019, mu nama nyunguranabitekerezo ku mikoranire n’imibanire hagati y’Abanyamakuru n’Abanyapolitiki. Ashimangira ko abanyamakuru bafite uruhare rukomeye mu iterambere ry’Igihugu ndetse bakabikora bitangira umuturage.

Gasamagera avuga ko umunyamakuru n’umunyapolitiki bakora by’umwuga bagomba kuba basobanukiwe neza uburenganzira bwabo, ibyo bemerewe n’ibyo babuzwa n’amategeko. Aha niho ahera avuga ko hakwiriye ukoroherezanya hagati yabo.

Ati “Abanyapolitiki bakwiye gutanga amakuru, bavuga ku biriho n’ibiteganywa. Ntibagomba kwishisha ababasaba amakuru. Ariko n’abasaba amakuru basabe amakuru yumvikana y’ukuri. Bahuriye ku kuyobora umuturage bamwereka icyo akwiriye gukurikira cy’ukuri. Bitabaye ibyo umuturage yabatakariza icyizere”.

Avuga ko ihuriro ry’Imitwe ya Politiki rigomba kuba ikiraro cyo kunoza imikoranire hagati y’Abanyamakuru n’Abanyapolitiki. Itangazamakuru rigakora kinyamwuga risigasira ibyo igihugu cyagezeho rinareba uko hagerwa ku bindi biruseho mu gihe ngo n’abanyapilitiki ngo baba bagomba kurangwa n’ubworoherane.

Inararibonye mu by’ itangazamakuru, Rushingabigwi Jean Bosco, na we avuga ko abanyamakuru bakwiye gusobanukirwa n’amahitamo y’umurongo wa Politiki u Rwanda rwahisemo, ko buri gihugu gihitamo umurongo wa Politiki kibona ukibereye bitewe n’amateka yacyo n’aho gishaka kugana.

Itegeko ryo muri 2003, riteganya ko amakuru asabwa n’umuntu ku giti cye cyangwa itsinda ry’abantu mu rurimi urwo ari rwo rwose mu ndimi zemewe n’Itegeko Nshinga rya Repubulika y’u Rwanda hakoreshejwe imvugo, inyandiko, telefoni, ikoranabuhanga n’ibindi, hagamijwe gutuma abaturage n’abanyamakuru babona amakuru yo mu nzego za Leta no mu nzego zimwe z’abikorera.

Muri Kamena 2018, Urwego rw’Umuvunyi rwatangazaga ko kuva mu 2013 ubwo iri tegeko ryerekeye kubona amakuru ryatorwaga, rwari rumaze kwakira ibirego 20 birimo 15 by’abanyamakuru barega abayobozi bakuru kudatanga amakuru.

Urwego rw’Abanyamakuru bigenzura (RMC) rwo rwavugaga ko rwakiriye ibirego 297 Itangazamakuru ryagiranye n’abantu ku giti cyabo cyangwa inzego muri rusange.

 

 

 

Izindi wakunda

Bwiza.com
error: Ntibyemewe