bwiza.com
Ahabanza » Anselme twabanaga mu nzu, kumwica ni nko kunyicira umwana, ni ukunkora mu nda- Ingabire Victoire
Amakuru Politiki

Anselme twabanaga mu nzu, kumwica ni nko kunyicira umwana, ni ukunkora mu nda- Ingabire Victoire

Perezida w’ishyaka FDU-Inkingi, Ingabire Victoire arasaba inzego z’ubutabera gukora ibishoboka byose abishe umuyoboke we, Mutuyiman Anselme bakamenyekana. Gusa ngo na we agiye kwikurikiranira iby’uru rupfu rwe dore ko ngo yamufataga nk’umwana we.

Mutuyimana Anselme w’imyaka 30, yari umuyoboke w’ishyaka FDU-Inkingi rya Ingabire Victoire, yishwe mu ijoro ryo ku wa 8 rishyira ku wa 9 Werurwe 2019. Umurambo we ubonwa mu  ishyamba rya Gishwati riherereye mu Majyaruguru y’Iburengerazuba bw’igihugu.

Urwego rw’Ubugenzacyaha mu Rwanda(RIB) rwatangaje ko rwafashe umuntu umwe ucyekwaho kuba inyuma y’urupfu rwa Anselme. Umuvugizi wa RIB, Mbabazi Modeste yatangarije VOA ko uwafashwe arimo guhatwa ibibazo kugira ngo hamenyekane iby’urupfu rw’uyu musore Anselme  ariko yirinda gutangaza amazina y’uwafashwe dore ko hagikorwa iperereza.

Perezida w’iri shyaka FDU-Inkingi ritari ryemerwa mu Rwanda, Ingabire, atangaza ko yamenye amakuru y’uko hari uwafaswe, agasaba inzego z’ibishinzwe gukomeza gukora iperereza kugira ngo Anselme abone ubutabera.

Yagize ati “Ntabwo twari twamenya uwo muntu uwo ari we, icyo twebwe twifuza ni uko Anselme ahabwa ubutabera, abamwishe bagafatwa, abamwishe bamutwaye ku manywa y’ihangu abantu bareba, abamutwaye abaturage barabazi, ntekereza ko abamutwaye bagiye kubaza abo baturage kugira ngo bababwire neza abamutawaye[…].

Ingabire akomeza avuga ko mu minsi mike azashyiraho itsinda ry’abantu bazakurikirana iyicwa ry’umuyoboke we by’umwihariko, kugeza igihe ukuri kuzamenyekana.

Ati “Ni umuntu wa Kabiri upfuye, ntekereza ko tubaye tubirekeye ahongaho abantu babigira akamenyero bakumva ko muri FDU bazajya barobamo bakica uko bashaka, Anselme ni umuntu twabanaga hano mu nzu, ni nko kunyicira umwana, ni nk’umwana wanjye bishe, namufataga nk’umwana wanjye, angana n’umukobwa wanjye w’imfura. Ntabwo rero umuntu yankora mu nda ngo anyicire gutyo, ngo yumve ko byahagarara”.

Akomeza avuga ko ariyo mpamvu yiyemeje gusaba inzego z’ibishinzwe gukora ibishoboka byose Anselme akabona ubutabera, mu rwego rwo guca umuco wo kudahana.

 

 

 

Izindi wakunda

2 Ibitekerezo

SIMON March 15, 2019 at 11:12 am

Pole sana, uzishumbusha undi cg uzasange umugabo wawe ureke kwiruka mu rubyiruko ruto mutanganya imyaka. Dore umaze no gushiramo.

Subiza
Mbonyizina March 15, 2019 at 12:10 pm

Warajogotse mama, nibagutabare kdi bakwihanganishe. Gusa ntuzongere kubana n’abantu bavuga ko bahagarariye ibintu bitemewe na Leta.

Subiza

Tanga Igitekerezo

Bwiza.com