bwiza.com
Ahabanza » Impunzi z’Abarundi zirimo gutoroka inkambi zabagamo muri Tanzania
Amakuru Politiki

Impunzi z’Abarundi zirimo gutoroka inkambi zabagamo muri Tanzania

Impunzi z’Abarundi zabaga mu nkambi z’impunzi muri Tanzania, zazitorotse zijya mu bihugu byo kuri uyu mugabane. Mu gihe umubare utari watangazwa w’abatorotse, ngo bamwe berekeje muri Afurika y’Epfo, Rwanda, Zambia na Repubulika Iharanira Demokarasi ya Congo.

Inkambi eshatu zitangazwa ko izi mpunzi zatorotsemo ni iya Nduta, Nyarugusu na Mtendeli. SOS Media/ Burundi igatangaza ko izi mpunzi zatorotse zivuga ko zirambiwe kubaho zimeze nk’iziri muri gereza muri izi nkambi.

Kuban izi nkambi ngo zarinjiriwe n’Imbonerakure zigizwe n’urubyiruko rw’ishyaka CNDD FDD, riri ku butegetsi mu Burundi, nayo ni indi mpamvu itangazwa itera bamwe kuzivamo bagahunga.

Umwe mu bayobozi b’inkambi ya Nduta utatangajwe amazina, yatanze amakuru agira ati “Imbonerakure n’abakozi ba SNR [Urwego rushinzwe ubutasi mu Burundi] baturutse i Bujumbura baza mu bikorwa by’iterabwoba hano, hari imitwe y’abitwaje intwaro izengurutse inkambi, abo bafashe babakorera iyicarubozo, abajya gushaka ibicanishwa n’abandi bajya hanze y’inkambi nta mutekano baba bafite, hari abafite ubwoba ko bacyurwa ku ngufu. Mbese hari impamvu nyinshi zibatera gutoroka”.

Undi mutangabuhamya avuga ko hari impunzi 30 zatorotse inkambi ya Mtendeli ku wa Gatandatu w’icyumweru gishize, polisi yaje kubafata ibasubiza mu nkambi.

Yagize ati “Hari impunzi zisaga 30 zatorotse inkambi zifatwa na Polisi zitaragera kure y’inkambi ya Mtendeli ziragarurwa. Ntabwo tubizi niba nyuma zararetswe zigakomeza urugendo, kuko zari zararangije kugurisha ibyazo byose zari zifite mu nkambi.

Ishami rya Loni rishinzwe impunzi (UNHCR) ritangaza ko kuva mu mwaka wa 2016, hari impunzi nyinshi zagiye zitoroka inkambi zo muri Tanzania zikajya mu bindi bihugu. Izi nkambi zo muri Tanzania zikaba zibarurwamo Abarundi basaga ibihumbi200.

Izindi wakunda

Bwiza.com