bwiza.com
Ahabanza » Museveni yise Bobi Wine umunyarwenya utabashije politiki amusaba kwigumira mu muziki
Amakuru Politiki

Museveni yise Bobi Wine umunyarwenya utabashije politiki amusaba kwigumira mu muziki

Perezida Yoweri Museveni wa Uganda yise Depite Robert Kyagulanyi uzwi nka Bobi Wine Umunyarwenya avuga ko adashoboye politiki ahubwo ashatse yakwigumira mu muziki.

Ibi Perezida Museveni yabivuze ubwo yahuraga n’Urubyiruko rwo mu Mujyi wa Kampala ku ngoro ye, aho yabahaye akayabo ka miliyari 2,5 z’amashilingi yo kubafasha mu mishinga yabo.

Perezida Museveni ati: “Bobi Wine ni umuhanzi. Ibi (politiki) si ukuririmba. Niba uri umuhanzi jya kwa Suzanna na Nakulabye.”

Iyi nkuru dukesha NTV irakomeza ivuga ko Suzanna kari akabyiniro kamamaye mu myaka ya za 70.

Bobi Wine w’imyaka 37, aherutse gutangaza ko ashoboora kuzahatanira umwanya w’umukuru w’igihugu mu 2021. Azaba ahanganye na Perezida Museveni uri ku butegetsi kuva mu 1986 ndetse ishyaka rye rikaba riherutse kumwemeza nk’umukandida waryo rukumbi.

Perezida Museveni yagerageje kwiyegereza uru rubyiruko rwo muri Kampala avuga ko rwirengagijwe n’abayobozi b’ishyaka NRM nk’uwahoze ari Minisitiri w’Intebe, Amama Mbabazi, n’umuyobozi wa NRM muri Kampala, Capt. Francis Babu avuga ko yari yarahaye ububasha bwo kurufasha.

Yavuze rero ko kuri ubu gufasha uru rubyiruko yabigize ibye. Uru rubyiruko rurimo urubarizwa muri NRM no mu batavuga rumwe n’ubutegetsi ngo rukaba rwaboneyeho kumusaba kuziyamamaza mu 2021.

Perezida Museveni yakomeje ashinja Depite Robert Kyagulanyi gusunikira urubyiruko mu bugizi bwa nabi, avuga ko byagize ingaruka ku isura y’igihugu n’ishoramari. Ntiyigeze ariko atunga urutoki Dr Kiiza Besigye wo mu ishyaka FDC, ari nawe munyapolitiki utavuga rumwe n’ubutegetsi bakunze guhangana mu matora yabanje.

Perezida Museveni ati: “Nta kibazo mfite cyo gukorana n’abantu bo muri ghetto. Biroroshye kubakangura kubera ko bari ahantu hamwe. Icyo ukeneye ni ukubageraho.”

Yakomeje avuga ko Bobi Wine n’abandi bayobozi batavuga rumwe n’ubutegetsi muri Kampala bari gukoresha abantu bo muri izo ghetto mu guteza imyivumbagatanyo. Mu myaka yashize kandi iyi nkuru iributsa ko Bobi Wine yajyaga yiyita Perezida wa Ghetto kubera ukuntu yakundaga kwiyegereza abantu baba muri ghetto ahitwa Kamwokya.

Perezida Museveni yabwiye uru rubyiruko ko abantu rwizeye rukabatora barugambaniye. Ati: “Ubwo abantu banjye bacogoraga, mwatoye Ssebagala, ntiyabakoreye. Mwatoye Ssebaana…akazi ka Ssebaana kari gusa ako kugurisha amasoko na parikingi.”

Atiriwe avuga umuntu abatavuga rumwe n’ubutegetsi baba barishe, Museveni yagize ati: “Abatavuga rumwe n’ubutegetsi ni abicanyi. Sinabwira umwuzukuru wanjye ngo ajye mu kaga kuberako nshaka ubutegetsi.”

Iyi nkuru ariko yibutsa Museveni ko urukiko ari rwo rwonyine rufite ububasha bwo kuvuga ko umuntu ari umwicanyi. Bobi Wine ngo akaba yarakunze gushishikariza abayoboke be kwirinda ubugizi bwa nabi mu myigaragambyo.

Uyu ndetse akaba yarabuze umushoferi we, Yasin Kawuma warashwe n’abashinzwe umutekano kuwa 13 kanama 2018 muri Arua.

Guverinoma ya Uganda nta raporo irasohora ku rupfu rwa Kawuma. Ni mu gihe ngo abandi bantu basaga 36, barimo abadepite bane n’abanyamakuru babiri batawe muri yombi mu buryo bubi muri ako kavuyo ko muri Arua.

Depite Robert Kyagulanyi n’abandi bantu basaga 30 bakaba barashinjwe ubugambanyi bashinjwa uruhare mu gutera amabuye imodoka ya Perezida Museveni muri Arua icyo gihe.

 

Izindi wakunda

Bwiza.com
error: Alert: Ntabwo byemewe!!