bwiza.com
Amakuru Politiki

U Burundi bwagaragaje ko budateganya gukomorera VOA na BBC vuba

Perezida w’Inama y’Igihugu y’Itumanaho (CNC) ari nayo ishinzwe itangazamakuru mu Burundi, yatangaje ko radio mpuzamahanga ebyiri, VOA na BBC zahagaritswe muri iki gihugu zizakomeza gukumirwa.

Bwana Nestor Bankumukunzi arashinja aya maradiyo kuba ari yo yarushijeho gukomeza dosiye ziyareba kubw’ibyo zikaba zizakomeza kubuzwa kumvikana mu Burundi.

Mu kiganiro yatanze kuri uyu wa Gatanu, itariki 15 Werurwe nk’uko tubikesha SOSMediasBurundi, Perezida wa CNC yatanze ibisobanuro kuri iki cyemezo cyo gukomeza gukumira VOA na BBC mu matwi y’Abarundi.

Yagize ati: “Mu gihe twari tugiye kongera gufungura BBC, iki gitangazamakuru  cyatambukije imbarankuru (documentary) kuri dosiye y’inzu, aho abashinzwe umutekano mu Burundi bica abantu. Ntabwo ari byo, ubushakashatsi bwagaragaje ibitanyuranye.”

Ku bireba Ijwi rya Amerika, yasobanuye ko yakomeje gukoresha umunyamakuru ushakishwa n’ubutabera bw’u Burundi. Ati: “Ni ngombwa ko iki gitangazamakuru kitwoherereza uyu munyamakuru ngo ahagarare imbere y’ubutabera. Nagirwa umwere, ashobora kwidegembya, ibitari ibyo, bizaba ngombwa ko asubiza uruhare rwe muri kudeta yo mu 2015.”

Iyi nkuru isoza yibutsa ko VOA na BBC zari zahagaritswe gukorera mu Burundi mu gihe cy’amezi atandatu muri Gicurasi 2018. Nyamara, nyuma y’amezi atandatu ibi bitangazamakuru byombi ntibyakomorewe kandi hari mbere y’uko iyo mbarankuru ya BBC yise ‘Kamwe Kamwe – Inside Burundi’s Killing Machine’ ijya hanze.

 

Izindi wakunda

Bwiza.com