bwiza.com
Ahabanza » Byaba bikabije Abagande badafite intasi hano mu Rwanda- Dr Kayumba
Amakuru Featured

Byaba bikabije Abagande badafite intasi hano mu Rwanda- Dr Kayumba

Impuguke muri Politiki akaba n’umwarimu muri Kaminuza, Dr Kayumba Christophe avuga ko ari ibintu byo gusetsa gusa kuba Uganda ivuga ko ikibazo ifitanye n’u Rwanda giterwa n’Abanyarwanda ngo bajyayo gukorayo ubutasi.

Dr. Kayumba avuga ko ubutasi bukorwa n’ibihugu byose, ndetse ko na Uganda itabura intasi zayo mu Rwanda. Agasobanura ko ubutasi ariryo banga ibihugu bikoresha mu gukurikirana inyungu zabyo mu bindi bihugu.

Ni mu kiganiro kuri Radiyo Flash Fm, Dr Kayumba yari yatumiwemo, mu isesengura riganisha ku mubano w’u Rwanda na Uganda umaze iminsi uvugwamo agatotsi.

Dr Kayumba Yagize ati “Iyo ugiye kureba ibivugwa mu itangazamakuru, Uganda ivugamo n’ibintu by’ubutasi, ndibaza y’uko abantu bakurikirana ukuntu ibihugu bibana n’ukuntu ibihugu bikurikirana inyungu zabyo mu bindi bihugu, nta gihugu na kimwe ku Isi kidakora ubutasi, na hano mu Rwanda nibaza ko byaba bikabije abagande badafite Abatasi hano, badafite za maneko hano! Niko ibihugu byose bikora”.

Akomeza avuga ko biteye ibitwange kuba Uganda yishingikiriza kuvuga ko ikibazo ifitanye n’u Rwanda gishingiye ku butasi buyikorerwamo. Ati “No mu bubanyi n’amahanga kuvuga ngo aba bantu bafite ba Maneko, ibyo ngibyo baguseka uvuze ngo ni ikibazo, kuko ibihugu byose birabikora, kuba Ubugande aribyo bavuga njyewe ndibaza y’uko ari ibintu byo gusetsa, gusa ntabwo icyo ngicyo nkibona nk’aho ari ikibazo”.

Uganda yararuciye irurumira

Hashize iminsi bitangazwa mu binyamakuru bitandukanye ko Perezida Museveni yahaye amabwiriza abayobozi ba Uganda kwirinda kugira ibyo batangaza ku byo u Rwanda rushinja Uganda. Dr Kayumba akavuga ko iri ari ikosa rikomeye ndetse rinashobora guteza ibindi bibazo mu gihe baba baryumyeho kandi ibibazo bihari.

Ati “Njyewe icyo mbonamo nk’ikibazo cyane, ni mu buryo butatu, icya mbere ni uko ubuyobozi bw’i Bugande bucecetse, ntabwo bushaka kukiganiraho, icyo ni ikibazo gikomeye kuko iyo ufitanye amakimbirane n’umuntu, ukavuga ngo ndacecetse, wizanira urwicyekwe kurushaho, icyo ni icya mbere gishobora no guteza ibindi bibazo kurushaho”.

Icya kabiri avuga, ni uko ikibazo u Rwanda na Uganda kirushaho gufata indi ntera, aho Uganda inavuga ko u Rwanda rwamaze gufatira ambargo ibicuruzwa byayo byinjiraga mu Rwanda cyangwa bikahanyuzwa bijyanwa mu bindi bihugu.

Icya gatatu uyu musesenguzi avuga, ni uko u Rwanda na Uganda byakagombye gushaka inzira binyuzamo ibibazo bifitanye, noneho bigafatanya mu gushakira hamwe umuti wabyo urambye.

Dr Kayumba avuga ko ikibazo cy’u Rwanda na Uganda kigeze ahakomeye ariko na none ko bishoboka ko cyakemuka amazi atararenga inkombe, dore ko bamwe banasesenguramo intambara ikomeye.

Agaruka ku byavuzwe na Perezida Kagame, Umunyamabanga wa Leta muri Minisiteri y’Ububanyi n’Amahanga, Ubutwererane n’Ibikorwa by’Umuryango wa Afurika y’Iburasirazuba, Amb. Nduhungirehe Olivier, na we wari umutumirwa muri iki kiganiro, yavuze ko u Rwanda rwifuza guhahirana na Uganda, mu gihe byanze ko u Rwanda rwiteguye.

Ati “ Na Perezida wa Repubulika yarabisobanuye, twebwe icyo twifuza ni ukuba inshuti na Uganda, nicyo kintu twifuza tugahahirana, icya kabiri, niba batifuza kuba inshuti natwe nta kibazo, icyo gihe twavuga tuti ‘mubeho ukwanyu natwe tubeho ukwacu’. Icya gatatu yatanze, niba abagande[ubuyobozi] bavuga ko hari ikibazo bafitanye natwe, batwanga, bashaka guhungabanya umutekano wacu, twebwe tuzabitegura, ntawe tuzendereza ariko tuzabitegura”.

Asoza umwiherero w’abayobozi i Gabiro, Perezida Kagame yahaye ihumure Abanyarwanda, ababwira kuryama bagasinzira, ko umutekano w’u Rwanda n’Abanyarwanda urinzwe.

Izindi wakunda

1 Igitekerezo

GSE 17/03/2019 9:08 am at 9:08 am

Ibintu mwanditse hano biteye isoni sinzi niba mwbisomye mbere yo kubitangaza. Murabeshyera Perezida Kagame kuko ntiyigeze avuga ko u Rwanda rutifuza kuba inshuti ya Uganda. Ahubwo mukwiye kumwadikira mukamusaba imbabazi. Dore uko mwabyandite kuri iyi site yanyu https://bwiza.com/2019/03/16/byaba-bikabije-abagande-badafite-intasi-hano-mu-rwanda-dr-kayumba/

“Na Perezida wa Repubulika yarabisobanuye, twebwe icyo tifuza ni ukuba inshuti na Uganda, nicyo kintu twifuza tugahahirana, …”

Subiza

Tanga Igitekerezo

Bwiza.com
error: Alert: Ntabwo byemewe!!