bwiza.com
Ahabanza » DRC: OMS yihaye intego yo kurandura burundu Ebola mu mezi 6 gusa
mu mahanga Ubuzima

DRC: OMS yihaye intego yo kurandura burundu Ebola mu mezi 6 gusa

Ishami ry’umuryango w’Abibumbye ryita ku buzima OMS ryihaye intego yuko mu gihe cy’amezi atandatu, rizaba ryaranduye icyorezo cya Ebola mu gihugu cya Repubulika Iharanira Demokarasi ya Congo.

Umuyobozi w’ishami ry’umuryango w’Abibumbye ryita ku buzima (OMS) Dr Tedros Adhanom Ghebreyesus yatangaje ko icyorezo cya Ebola gishobora kuba amateka muri Congo mu gihe cy’amezi atandatu , mu gihe ibintu byose byagenda neza uko byateganijwe.

Uyu muyobozi kandi yemeza ko ubugenzuzi bwakozwe bwerekana ko Ebola izaba yacitse mu ntara ya Kivu na Ituri mu mezi atandatu.Imibare iherutse gutangazwa na minisiteri y’ubuzima muri Congo , yerekana ko abantu 927 aribo banduye muri bo 584 barapfuye.

Mu kiganiro n’abanyamakuru I Geneve mu Busuwisi, Dr Tedros yavuze ko nta bantu bashya bacyandura mu duce twa Beni, Mangina, Komanda na Oicha muri Kivu y’Amajyaruguru. Yagize ati’’ Ntabwo Ebola igikwirakwira mu bindi bice by’igihugu, kandi ntabwo yageze mu bihugu by’abaturanyi. Ndatekereza ko aya ari amakuru meza. Icya kabiri , ntabwo icyandura ahubwo irikugabanuka’’

Gusa ngo ibibazo by’umutekano muke bigenda bikoma mu nkokora igikorwa cyo kurwanya Ebola, dore ko abarwanyi bitwaje intwaro bagenda bagaba ibitero ku baganga n’abakozi barigufasha abaturage banduye Ebola.

Nkurunziza Viateur @bwiza.com

Izindi wakunda

Bwiza.com
error: Alert: Ntabwo byemewe!!