bwiza.com
Amakuru Ubuzima

Imiti itujuje ubuziranenge itwara ubuzima bw’abana nibura 300,000 buri mwaka.

Ubushakashatsi bwakozwe n’ishami ry’umuryango w’abibumbye ryita ku buzima, WHO/OMS, buragaragaza ko abana basaga 300,000 bapfa bazize imiti itujuje ubuziranenge buri mwaka.

Imiti yashyizwe mu majwi ni iy’indwara nka Malariya, Pneumonia n’izindi.

Dr. Joel Breman, umujyanama mu by’ubumenyi mu kigo mpuzamahanga cya Leta Zunze Ubumwe za Amerika cyita ku buzima(US National Institute of Health), yatangarije CNN ko imiti nk’iyi izanwa n’abanyabyaha bayigana, bamara bakayicuruza.

OMS iravuga ko hari ubwoko butatu bw’imiti yakozwe itujuje ubuziranenge, itagaragaza uwayikoze cyangwa se aho yakorewe n’ibiyigize(composition cyangwa ingredients) bitagaragara.

Iyi miti kandi, ntiyanditswe, ntiba yarapimwe cyangwa ngo igire uruhusha rw’ubuziranenge.

Birasaba ubwitonzi kandi ku bigo by’ubuzima n’ibishinzwe ubuziranenge kuko mu bushakashatsi bwakozwe bugaragaza ko imiti itujuje ubuziranenge nk’iy’imyiganano, irushaho kwiyongera.

Ubu bushakashatsi burakomeza buvuga ko kurwanya bene iyi miti bikiri imbogamizi cyane ku bihugu bikennye ku mpamvu y’ikoranabuhanga riri ku rwego two hasi n’indwara nyinshi zibyibasira.

Michael Deats, umwe mu bakozi mu ishami rya OMS rishinzwe imiti itujuje ubuziranenge yatangaje ko bisaba ubufatanye hagati y’ibihugu ndetse n’inganda kugira ngo haboneke umuti w’iki kibazo.

Izindi wakunda

Bwiza.com
error: Alert: Ntabwo byemewe!!