bwiza.com
Ahabanza » Leta ya Trump yizeje Tshisedeki imikoranire myiza
Amakuru Politiki

Leta ya Trump yizeje Tshisedeki imikoranire myiza

Umunyamabanga wungirije wa Leta ya Amerika ushinzwe Afurika, Tibor Nagy, yagiriye uruzinduko muri Repubulika Iharanira Demokarasi ya Congo, agirana ibiganiro n’abayobozi batandukanye, abizeza ko Amerika izakomeza kugirana umubano mwiza n’ubuyobozi bushya bw’iki gihugu.

Nk’uko RFI ibitangaza, ngo muri uru ruzinduko rwe rw’akazi muri Congo, Tibor Nagy yaganiriye na Perezida Felix Tshisekedi ashima bimwe mu bikorwa bye arimo gukora mu ntangiriro z’ubuyobozi bwe, anamwizeza ko Amerika irajwe ishinga no gukomeza kunoza umubano n’iki gihugu cya Congo.

Yagize ati “Mu by’ukuri turajwe ishinga no gukorana na Congo nk’abafatanyabikorwa, ikiganza mu kindi. Ntekereza ko aribwo buryo ibintu byagakozwemo. Turifuza gutera ingabo mu bitugu  Perezida wanyu, tumufasha mu ntego ze z’indashyikirwa”.

Kuva aho Perezida Tshisekedi agiriye ku butegetsi mu ntangiriro z’uyu mwaka, aratanga ikizere ko ashobora gukora impinduka muri iki gihugu. Inyeshyamba amajana zimaze gushyira intwaro hasi zivuga ko icyo zaharaniraga ari Demokarasi, kandi yizewe nyuma y’intsinzi y’uyu muperezida.

Perezida Tshisekedi yatanze imbabazi ku mfungwa zisaga 700 za Politiki, ndetse ubu akaba akomeje kugirira ingendo hirya no hino ahereye ku bihugu bituranye na Congo, mu rwego rwo gukomeza umubano w’igihugu cye nabyo.

Perezida Tshisekedi yabaye Perezida wa Mbere wa Repubulika Iharanira Demokarasi ya Congo, wafashe ubutegetsi ku mahoro, atowe n’abaturage kuva aho iki gihugu kiboneye ubwigenge. Akaba yarasimbuye Joseph Kabila wari ubumazeho imyaka igera kuri 18.

Umunyamabanga wungirije wa Leta ya Amerika ushinzwe Afurika, Tibor Nagy

Izindi wakunda

Bwiza.com
error: Alert: Ntabwo byemewe!!