bwiza.com
Amakuru Politiki

U Burundi bwavuye ku izima bugiye gucyura abasirikare babwo 600 bari muri Somali

Leta y’u Burundi itangaza ko igiye kuvana abasirikare bayo 600 muri Somalia aho bari mu butumwa bwo kugarura amahoro muri iki gihugu.

Nk’uko byatangajwe n’umuvugizi w’Ingabo z’u Burundi, Col. Biyereke Floribert, avuga ko Umuryango wa Afurika Yunze Ubumwe wari wasabye u Burundi kuvana abasirikare babwo 1000 muri Somalia. Nyuma yo kuvanayo 400, ko 600 basigayeyo nabo bagiye gucyurwa vuba.

Ibi yabitangaje mu kiganiro abavugizi b’Ibigo bya Leta na za Minisiteri bagiranye n’abanyamakuru ku wa Gatanu tariki ya 15 Werurwe 2019. Avuga ko bari bakiri mu kazi kabo muri Somalia.

Yagize ati “Ni umwanzuro udaciye mu mucyo wafatiwe abasirikare bacu bari mu butumwa bw’amahoro muri Somalia[…] abasirikare 400 bamaze gutaha abandi 600 basigayeyo nabo bazacyurwa mu minsi mike hubahirizwa ibwiriza ryashyizweho n’Umuryango wa Afurika Yunze Ubumwe”.

Mu mpera z’umwaka ushize mu itangazo Minisiteri y’Ingabo mu Burundi yageneye itangazamakuru, yatangazaga ko abayisaba kugabanya abasirikare bayo bari mu butumwa bw’amahoro muri Somali, birengagije amasezerano yashyiriweho umukono muri Ethiopia ku wa 30 Ugushyingo 2018.

Col.Floribert Biyereke yavugaga ko uwo mwanzuro wo gusaba u Burundi gucyura abasirikare 1000 mu bo bufite muri Somalia basaga ibihumbi bitanu, ikubiye mu ibaruwa Umuryango wa Afurika Yunze Ubumwe woherereje akanama k’Umuryango w’Abibumbye gakorana na Amisom muri Somalia.

Muri urwo rwandiko Afurika Yunze Ubumwe yasabaga u Burundi ko aba basirikare babwo bataha guhera ku wa 28 Gashyantare 2019.

Col. Biyereke yavugaga ko aho kuba 1000 ahubwo u Burundi bwagombaga kuvana muri Somalia abasirikare babwo 341, bugasaba ababishinzwe gushishoza kuri iyi ngingo.

Mu kwezi gushize bwakuyeyo 400, abandi 600 bukaba bwari banze kubacyura, mu gihe Umuryango wa Afurika Yunze Ubumwe wo watangazaga ko nyuma y’itariki wagenwe, nta mushahara n’ubundi bufasha aba basirikare 600 bazongera guhabwa.

U Burundi ni igihugu cya kabiri nyuma ya Uganda mu bifite ingabo nyinshi muri iki gihugu cya Somalia. U Burundi bukaba busanzwe bufiteyo abasirikare basaga 5432.

 

 

Izindi wakunda

Bwiza.com