bwiza.com
Ahabanza » Uganda: Abanyeshuri 12 b’Abanyarwanda banze kuva mu gihugu nyuma y’aho ishuri bigagamo rifunzwe
Amakuru Politiki

Uganda: Abanyeshuri 12 b’Abanyarwanda banze kuva mu gihugu nyuma y’aho ishuri bigagamo rifunzwe

Abanyeshuri 12 b’Abanyarwanda bigaga muri Uganda banze kuva mu gihugu nyuma y’aho ishuri bigagamo ryisumbuye rya Kigezi High School rifunze imiryango kubera imyigaragambyo y’abanyeshuri.

Amakuru aturuka muri Uganda aravuga ko abanyeshuri 589 biga muri iri shuri riherereye mu Karere ka Kabale kuri uyu wa Gatanu ushize boherejwe iwabo nyuma y’imyigaragambyo yadutse abanyeshuri bamaze kumva ko ishuri ryabo ritazitabira amarushanwa y’umupira w’amaguru ya Copa Coca Cola.

Ariko, mu gihe abandi banyeshuri bazinze ibyabo bagasohoka mu kigo nyuma yo kuhohereza abapolisi, ngo abanyeshuri bagera kuri 12 baturuka mu Rwanda bashinze inkambi ku biro by’umuyobozi w’ishuri bamusaba kubafasha.

Umwe mu banyeshuri yagiraga ati: “Dufite impungenge ko nitwambuka mu Rwanda, tutazemererwa kugaruka kubera amabwiriza aheruka ya Guverinoma abuza Abanyarwanda kwinjira muri Uganda,”

Bakomeje bagira bati: “Dukeneye ubufasha bw’abayobozi b’ishuri kubera ko turacyashaka kwiga muri Uganda.”

Mu mpera z’ukwezi gushize nibwo Guverinoma y’u Rwanda yaburiye Abanyarwanda ibabuza gusubira muri Uganda kubera impamvu z’umutekano wabo.

U Rwanda rushinja iki gihugu guhohotera no gufata nabi abaturage barwo bajya cyangwa bakorera muri Uganda no kubafunga mu buryo bunyuranyije n’amategeko bikabaviramo gukorerwa iyicarubozo. Ibintu Uganda yo yemeza ko bitajya bibaho.

Umuyobozi wa Kigezi High School, Stephen Mugume, yagiriye aba bana inama yo kuguma mu ngo za bene wabo bari muri Uganda niba babafite cyangwa bakajya ahandi kubera ko ishuri ryafunzwe ku banyeshuri bose kugeza ubwo ababyeyi bazaterana bagafata umwanzuro ku kigomba gukurikira.

Mugume avuga ko ari icyemezo cyafashwe n’inama ya ba guverineri cyo kubuza abanyeshuri kwitabira imikino ya Copa Coca Cola kuko ngo yabatwaraga amafaranga menshi kandi bikarangaza abanyeshuri.

Ni mu gihe nyamara iri shuri ngo ari ryo ryegukanye irushanwa ryo mu mwaka ushize ku rwego rw’akarere nk’uko iyi nkuru dukesha Chimpreports ikomeza ivuga. Nubwo batsinze amarushanwa ariko ngo mu masomo abanyeshuri ntibitwaye neza.

 

Izindi wakunda

Bwiza.com
error: Alert: Ntabwo byemewe!!