bwiza.com
Amakuru Amateka n'umuco

Rwamagana: Ababyeyi barasabwa gukundisha abana babo umuco Nyarwanda

????????????????????????????????????

Ntwari ufite imyaka umunani na mukuru we witwa Nyirirugo batuye mu Kagari ka Cyanya, mu Murenge wa Kigabiro, bamaze kwamamara mu kuvuga amazina y’inka mu bukwe, bavuga ko umubyeyi wabo yabigishije amazina  y’inka n’indangagaciro z’umuco nyarwanda none bagasaba n’abandi kubyigisha abakiri bato.

Mu kiganiro Bwiza.com yagiranye n’abo bana, batangaje ko umubyeyi wabo yatumye biga uko bavuga amazina y’inka kandi bikaba bituma bamenye indangagaciro z’umuco nyarwanda.

Nyirurugo wiga mu mwaka wa Gatandatu w’amashuri abanza mu kigo cy’amashuri cya Espoire, avuga ko kumenya umuco bifasha abana bato kugira imyitwarire myiza.

Yagize ati “Abantu batuzi tuvuga amazina y’inka mu bukwe ndetse no mu bindi birori bitewe n’uko tuba dushaka kwereka ababyeyi ko bagomba kwigisha abana umuco wacu nk’abanyarwanda kuko abana benshi ntibakunda kumenya uwo muco ahubwo usanga bashaka kwigana umuco w’abanyamahanga bitewe nibyo baganira, babona mu mafilimi”.

Ntwari we agira ati “Papa yatwigishije kuvuga amazina y’inka turabikunda, tuva ku ishuri twagera mu rugo tugasubiramo amasomo twize ku ishuri twamara kwiga akanatwigisha iby’umuco w’abanyarwanda ndetse n’amazina y’inka , ababyeyi bafashije abana babo kumenya umuco byatuma nabo bamenya kubaha abantu bakuru nk’uko natwe papa abitwigisha”.

Umubyeyi w’aba bana, Mushinzimana Rachid akaba n’umuyobozi w’itorero ndangamuco Imanzi,  avuga ko bamaze kumenya kuvuga amazina y’inka byatumye yiyemeza gushyiraho gahunda yo kwigisha abana umuco Nyarwanda.

Ati “Maze imyaka irenga 14 nigisha urubyiruko kubyina imbyino gakondo ariko nyuma naje gusanga umuco nyarwanda ushobora kuducika nitutawigisha abana bacu, nahereye ku banjye kugeza ubu bavuga amazina y’inka neza ku buryo byanyeretse ko dushyize imbaraga mu kubigisha indangagaciro z’umuco nk’ibisakuzo n’imigani n’amazina y’inka byatuma bakomera ku muco mwiza wacu aho kwigana umuco w’abandi”.

Itorero Imanzi rimaze imyaka Ine ryigisha   umuco nyarwanda abana bari hagati y’imyaka Umunani na 15 , abakobwa 33 n’abahungu 12.

Meya wa Rwamagana, Mbonyumuvunyi Radjabu n’abandi bayobozi bacinyana akadiho n’abana

 

 

Izindi wakunda

Bwiza.com
error: Alert: Ntabwo byemewe!!