bwiza.com
Amakuru Politiki

U Rwanda na Uganda bishobora kumvikana mbere y’ U Burundi ?

Nyuma yaho umubano w’ u Rwanda n’ u Burundi utangiye gucumbagira kuri  ubu haravugwa umwiryane no guterana amagambo hagati ya Leta ya Uganda n’ u Rwanda.

Hagati y’ ibi bihugu by’ inshuti(Rwanda na Uganda) ibintu  byarahindutse intambara y’ amagambo yafashe intebe mu ruhame.

Kuva aho U Rwanda rutangaje ko hari imirimo y’ubwubatsi irimo gukorwa ku mupaka, za rukururana za Uganda ntizishobore kwambuka iki gihugu cyatangiye gushinja U Rwanda ko rubangamiye urujya n’ uruza rw’ ibintu n’ abantu.

Imva n’ imvano yo kutumvikana hagati y’ U Rwanda na Uganda

Hashize umwaka urenga, Leta y’ U Rwanda ivuga abaturage bayo bafungirwa hirya no hino muri Uganda by’ umwihariko mu murwa wa Kampala.

Mu gihe Leta ya Uganda ishinja abo banyarwanda ubutasi n’ iterabwoba, Leta y’ U Rwanda nayo ntihwema kuvuga ko Uganda ishyigikiye ihuriro Congrès national rwandais, (RNC) riyobowe na Faustin Kayumba  Nyamwasa.

Ni mu gihe Leta ya Museveni ikomeje gutsemba ko idakorana na RNC , U Rwanda rufata nk’ umutwe w’ iterabwoba.

Biciye mu itangazamakuru ku mpande za Uganda n’ U Rwanda, Minisiteri z’ Ububanyi n’ amahanga ziritana ba mwana aho buri ruhande rushinja urundi kuba intandaro yo kudacana uwaka.

Dr. Richard Sezibera yashimangiye ko U Rwanda rufite amakuru yizewe yerekana ko Uganda ishyigikiye abashaka kurutera(RNC) ndetse icyo gihugu cyibasira abaturage b’ abanyarwanda bakorera cyangwa batuye muri Uganda.

Ku rundi ruhande, Minisiteri y’ Ububanyi n’ Amahanga ya Uganda igira iti” Nta muntu ugamije gutera no guhungabanya igihugu duturanye twaha ubutaka bwacu”.

Nubwo bivugwa gutyo, umubano w’ ibihugu byombi ukomeje kurangwa n’ ubukonje!

Ese Uganda n’ U Rwanda bizumvikana?

Amateka hagati y’ ibihugu byombi ashobora gutuma umuntu atemera ko ibi bihugu byarwana.

Iyo niyo mpamvu nyamukuru itanga icyizere ko kumvikana bishoboka ndetse bikaba vuba na bwangu.

Nubwo Uganda n’ U Rwanda bifitanye igihango gishingiye ku bufatanye bw’ intambara zo kwibohora, muri politiki byose birashoboka kuko  inshuti ishobora kuba umwanzi bityo n’ umwanzi akaba inshuti mu gihe gito.

Na none amasesengura akorwa agaragaza ko ubwumvikane bucye cyangwa amakimbirane ari hagati y’ U Rwanda na Uganda ashobora kuvugutirwa umuti vuba kurusha ayo U Rwanda rufitanye n’ U Burundi.

Ubukungu intandaro yo kumvikana

Uburemere bw’  ubucuruzi bukorwa hagati y’ u Rwanda na Uganda ndetse n’ inyungu zigera ku bindi bihugu byo mu Karere ka Afurika y’ u Burasirazuba bishobora kuba intandaro yo kumvikana vuba hagati y’ ibihugu byombi.

Ibi bitandukanye n’ inyungu U Rwanda rwaba rufite ku Burundi bimaze igihe bitavuga rumwe aho ibarurishamibare ryagaragaje ko abantu bajyaga mu Burundi bagabanutseho 70%.

Ntabwo ari ku bw’ impanuka , Perezida wa Kenya, Uhuru Kenyata aherutse kugera i Kigali akagirana ikiganiro na mugenzi we Paul Kagame.

Nyuma yo kuva mu Rwanda, Perezida Uhuru yahise ajya kuganira na Perezida Yoweri Kaguta Museveni mu rwego rwo kureba uburyo umwuka mwiza warushaho kurangwa hagati y’ ibihugu bya EAC.

Ibihugu bya Kenya, Ouganda ndetse n’ u Rwanda nibyo biri imbere mu iterambere rusange tugereranyije n’ ibindi bihugu byo muri EAC.

 

Gaston Rwaka/Bwiza.com

 

Izindi wakunda

1 Igitekerezo

Nkunda amahoro 26/03/2019 12:25 am at 12:25 am

Ndemeranya namwe kuri ik gitekerezo cyanyu

Subiza

Tanga Igitekerezo

Bwiza.com