bwiza.com
Ahabanza » Hon. Sebaba aribaza amaherezo ya Gen. Laurent Nkunda umaze imyaka 10 muri gereza
Featured Honorable SEBABA IBITEKEREZO

Hon. Sebaba aribaza amaherezo ya Gen. Laurent Nkunda umaze imyaka 10 muri gereza

Imyaka irenga gato 10 uyu mu General wo mu ngabo za Congo afungiye mu Rwanda. Hari ku wa 22/01/2009 ubwo uyu musirikare yari amaze igihe kitari gito yamamaye mu gihugu cye, mu karere ndetse no mu mahanga ya kure kubera uko ingabo ze zari mu ishyaka yise CNDP ubwo nyinshi murizo zavuye murindi ryitwaga RCD zarwanyaga ubutegetsi bwa Congo bivugwa ko yaragamije kurengera ubwoko bw’Abatutsi bwari mu kaga, buhohoterwa n’abandi banyekongo, bukicwa, bugasahurwa, abenshi bagahungira mu bihugu bituranyi.

Ikigenderewe muri iyi nyandiko si ukuvuga ibigwi by’uyu musirikari cyangwa amateka ye usibye kwibaza iby’amaherezo ye kuko ibye byacecetse bikaba bitavugwa.

Mbere y’uko dutanga igitekerezo cyacu, umuntu ntiyabura kwibukiranya muri make iby’amateka ye ariko mu magambo ahinnye cyane mu byerekeye ibya gisirikare. General Laurent Nkunda, bakundaga kwita Karumuna ubusanzwe yari umuntu uzwiho ubwenge, intyoza mu kuvuga indimi no kwigisha. Kuko yari umwarimu aba n’umuvugabutumwa, ibyo bikamuhesha kumenya kuvugana n’abantu akagira n’imbwirwaruhame zisobanutse kandi zumvikana.

Amaze kwinjira mu gisirikare byamuhesheje amahirwe yo gutera igipindi abasirikare yayoboraga kimwe no guhugura abaturage aho ingabo ze zabaga zigaruriye. Amakuru amwe avuga ko ashobora kuba yarabonye amanota ya mbere ubwo yari kumwe n’abandi bayobozi ba RCD bari mumahugurwa mu Rwanda i Gako cyangwa Gabiro, biga ibya gisirikari na politiki! Ubwo bwenge bwe bwamuhesheje kumenywa n’abakuru bituma abonwamo ubushobozi mu byo kuyobora. Urebye ayo mateka ninayo yamuhesheje kuzamuka byihuse no kubona amapeti yo hejuru ya gisirikari.

Uko byagenze rero bibara umupfu, nubwo ntariwe urugendo n’inzozi bye byaje gukomwa mu nkokora n’ibibazo bivugwa ko byari mu ngabo ayobora kuko hatangiye kuvugwamo itonesha rishingiye ku cyenewabo, kunyereza n’ibindi. Ibintu umuntu atakwemeza neza ariko byaje gutuma akorerwa ikimeze nka military coup bityo ingoma zihindura imirishyo. Iyo mirishyo nayo yatumye hari abatangira kwibyinira intsinzi mbere y’ivuzwa ry’ingoma.

Aha umuntu akaba yakwibutsa ko icyo gihe cy’intambara ikaze, Kabila amaze kujegera ngo yaje gusa n’uwumvikanye n’u Rwanda kuko amakosa yose yateraga ubwumvikane buke hagati ya Congo n’u Rwanda nko kuba Congo yarashyigikiraga umutwe wa FDLR agiye gukosorwa bityo hakaba ubufatanye mu kuyirandura. Akaba ari uko mwumvise iby’ingabo kabuhariwe special force, z’u Rwanda zambutse muri Congo. CNDP ikomwa mu nkokora ityo kubera izo mpamvu zombi, amakimbirane cyangwa ubwumvikane buke bwari butangiye kuvugwa mu ngabo ( umuntu atapfa kumenya uwaba yarayahembereye) n’izo nyungu za politiki hagati ya Congo n’u Rwanda.

Icyo byatanze ni uko General Nkunda yahiritswe ku buyobozi bwa CNDP mu gihe gito cyane urugamba rurarangira, havangwa ingabo, bariyeri zose mugice cy’intambara zikurwaho intego y’urugamba rwa CNDP ipfuba ityo!

Ibyo ariko ntibyarangiriye aho kuko izo mpinduka Nkunda atarazizi amera nkuwatunguwe n’ibyegera bye ntibyasobanukirwa ibyabaye kuko batari babyiteze. Amakuru kandi akavuga ko Nkunda yaba yarahamagajwe ku Gisenyi kugira ngo agezweho iby’izo mpinduka ahageze ngo nibwo yafashwe arafungwa.

Nyuma y’ifungwa rye hatangiye imanza z’ukuntu yarekurwa kuko abamwunganira bavugaga ko afunzwe muburyo bunyuranije n’amategeko. Uko byaje kurangira ntimumbaze, gusa ntaho nzi yigeze akatirwa cyangwa agirwa umwere.

Mu gihe ibyo bihari Congo yaregaga uyu musirikari ibyaha by’intambara byasabaga ko u Rwanda rumutanga. Bigasobanurwa ko mu rwego rw’amategeko nta masezerano yariho hagati y’ibihigu byombi yo guhanahana abakoze ibyaha. Ibyo bikaba aribyo byatumye u Rwanda rudashobora kumushyikiriza urukiko kuko rutari umunyamuryango warwo. Uko kudashoboka kw’ibintu nkibyo no gukomeza kumufunga, niho nshingira nibaza iherezo ryabyo.

Haba hari ibiganiro bikorwa biganisha kukumufunga byemewe n’amategeko cyangwa kumurekura? Imyaka amaze mu buroko yose ari uwakatiwe ntaba yarashoje cyangwa ari hafi gusoza? Niba hari ikibazo cy’amategeko ahubwo nticyaba kurwego rwo kuyasobanura ( interpretation)? Urebye uko iki kibazo giteye wasanga haba harimo gukurura wishyira ku nyungu za politiki.

Mperutse kuvuga ko amacenga abera mu mukino wa politiki aba atoroshye! Niba nta masezerano ahari yo muri ubwo buryo, haba harashingiwe kuki Congo yohereza mu Rwanda bamwe mu bayobozi bakuru ba FDLR bari baherutse gufatirwa! Ikibazo nibaza aha si uko Nkunda yakoherezwa muri Congo ahubwo ifungwa rye rigasobanuka kandi ikibazo cye kigakemurwa bishingiye kumategeko akaba yafatwa kimwe n’izindi mpunzi zose.

Ihagarikwa ry urugendo rwa CNDP ubwabyo ntibyakemuye ikibazo cyari gihari cya politiki kuko ari nabyo byabyaye M23 nayo yaje gusoza nabi ingabo zisubiranyemo kugeza ziyobotse iy ubuhungiro. Iyo mitwe yose itabashije kugera Ku ntego si uko bari abaswa cyangwa ibigwari, ahubwo biterwa no kuba umushinga w impinduramwatwara uba atari uwabo kuko ibitari ibyawe ubinyagwa mu gihe bikenewe. Ntawe nifuza gusaba kuvuga igihe uyu mukongomani azarekurirwa ariko byaba ibyo kwibazwaho kuko byonyine kuba ari Umututsi Congo idateze gushishikara imusaba nk’umwenegihugu kuko kuriyo niyo yapfira mu buroko ntacyo byaba biyibwiye.

No kumurekura kubera ikibazo cy amategeko nkeka ko Congo itarara yambutse imipaka izanywe no kumutwara ku ngufu. Mu rwego rwo kumutabara kuko imyaka amaze ari myinshi harebwa uko yarengerwa byaba na ngombwa ibiganiro bya politiki n’amategeko bigakomeza ariko agasubizwa uburenganzira bwe ariko nawe kimwe n’abandi bose bakajya bibuka no kumenya ikibahatse!

Izindi wakunda

Bwiza.com
error: Ntibyemewe