bwiza.com
Ahabanza » Amajyaruguru: Min. Nyirahabimana yasabye inzego zose kugira uruhare mu gukemura ibibazo byugarije umuryango
Amakuru Umuryango

Amajyaruguru: Min. Nyirahabimana yasabye inzego zose kugira uruhare mu gukemura ibibazo byugarije umuryango

Minisitiri w’Uburinganire n’Iterambere ry’Umuryango Amb. Soline Nyirahabimana, avuga ko hakenewe ukwishyira hamwe kw’inzego mu guhangana n’ibibazo bikigaragara mu miryango kuko hatabaye uruhare rwa buri wese ngo inzego zitandukanye z’ubuyobozi zibigize ibyazo bitakemuka.

Yabitangaje kuri uyu wa Gatatu tariki ya 27 Werurwe 2019, mu nama mpuzabikorwa n’abayobozi b’Intara y’Amajyaruguru, ab’uturere n’abafatanyabikorwa bo muri iyi Ntara mu rwego rwo kuganira ku ruhare rwa buri wese mu gushakira hamwe umuti w’ibibazo bikibangamiye umuryango.

Min Nyirahabimana yasabye abitabiriye inama mpuzabikorwa mu Ntara y’Amajyaruguru kongera imbaraga mu kurwanya ibibazo byose bibangamira umuryango birimo imirire mibi, ihohoterwa rikorerwa abana/gutwita kw’abangavu, guta ishuri kw’abana n’amakimbirane mu miryango,…

Avuga ko hakenewe ubufatanye mu nzego zitandukanye, ati “ Gukemura ibibazo bikibangamiye umuryango bisaba ko inzego zose zishyira hamwe, zigashaka ibisubizo n’ingamba zo guhangana n’ingaruka z’ibi bibazo. Iyi niyo mpamvu twahuriye muri iyi nama nk’abafatanyabikorwa kugira ngo dushyire hamwe imbaraga”.

Yasabye inzego zose zitabiriye iyi nama guha umwanya abaturage bakagira uruhare mu bibakorerwa bakabigira ibyabo hagamijwe ko batanga umusanzu mu gushaka ibisubizo n’ingamba z’ibibazo bibangamiye umuryango.

Guverineri w’Intara y’Amajyaruguru, Gatabazi Jean Marie Vianney avuga ko Mu Ntara y’Amajyaruguru biyemeje guhagurukira ibibazo bibangamira umudendezo w’umuryango birimo gukurikirana abasambanya abana, abatera abangavu inda z’imburagihe, kurwanya imirire mibi n’igwingira, ikibazo cy’inzererezi n’amakimbirane mu muryango,..

Yagize ati “N’ubwo hari byinshi twagezeho mu guteza imbere umuryango, turacyafite ibibazo bitandukanye, birimo iby’ihohoterwa rishingiye ku gitsina, abana bato baterwa inda, imiryango ibana mu buryo butemewe n’amategeko n’ibindi, ariko twafashe ingamba zo guhangana na byo”.

Umuryango niwo shingiro ry’igihugu

Ubwo yifatanyaga n’abaturage b’umurenge wa Kagano, mu Karere ka Nyamasheke, Intara y’Iburengerazuba, ku wa 8 Werurwe 2019, mu biroro byo kwizihiza Umunsi Mpuzamahanga w’Abagore, Madamu Jeannette Kagame yabatangarije ko Umuryango ariwo shingiro ry’igihugu.

Yabibukije ko gahunda ya Guverinoma y’u Rwanda  y’imyaka irindwi, ifite intego yo “Kugira Umunyarwanda ushoboye, ufite ubumenyi, ubuzima bwiza, kandi  ubayeho neza mu muryango utekanye. Akabibutsa ko nabo bafite uruhare rukomeye mu kubaka uyu Munyarwanda.

Yagize ati “Umuryango niwo shingiro ry’igihugu. Dufite inshingano rero zo kuwuherekeza,  mu cyerekezo twihaye cyo kubaka Umunyarwanda ushoboye, ubayeho neza kandi utekanye”.

Umufasha wa Perezida wa Repubulika yasabye by’umwihariko Incuti z’Umuryango, Gahunda z’Iyobokamana zitandukanye, Abunzi, Ababyeyi b’abagabo n’abagore bose hamwe, gufatanya gushaka umuti urambye w’ikibazo cy’ amakimbirane mu muryango.

Guv. Gatabazi J.M.V avuga ko Intara y’Amajyaruguru yiyemeje guhagurukira ibibazo bibangamira umudendezo w’umuryango

Izindi wakunda

Bwiza.com
error: Alert: Ntabwo byemewe!!