bwiza.com
Ahabanza » Migi afashije APR FC gutsindira Mukura VS imbere y’abafana bayo
Imikino

Migi afashije APR FC gutsindira Mukura VS imbere y’abafana bayo

????????????????????????????????????

Umukinnyi Mugiraneza Jean Baptiste bakunze kwita ‘Migi’ afashije ikipe ya APR FC gutsinda ikipe ya Mukura Victory Sports ibitego bibiri kuri kimwe (2:1) bikaba bifashije APR gushimangira umwanya wa mbere ku rutonde rwa Shampiyona.

Uyu mukino watangiye ikipe ya APR FC isatira mu buryo bukomeye aho yaje kubona igitego ku munota wa 18 gitsinzwe na rutahizamu wa APR Muhadjiri Hakizimana.

Mukura VS yagerageje kwishyura igitego ariko APR FC ikabarusha umupira hagati mu kibuga bituma igice cya mbere kirangira APR ariyo iyoboye umukino.

Igice cya kabiri cyatangiye Mukura isatira ishaka kwishyura igitego yari yatsinzwe. Umutoza wa Mukura Haringingo Francis Christian yahise akora impinduka ku munota wa 62 akuramo Ndayishimiye Christophe ashyiramo Biramahire Abeddy mu rwego rwo kongerera ubusatirizi imbaraga.

Impinduka Mukura yakoze, zaje kubyara umusaruro bituma ku munota wa 66 Mukura yishyura igitego gitsinzwe na Sibomana Patrick bakunze kwita ‘papi’. Uyu mukinnyi akaba yaranakiniye ikipe ya APR FC mu myaka yashize. Mukura yakomeje gusatira ngo ibone igitego cy’insinzi ariko APR ikayibera ibamba.

Ku munota wa 89 nibwo capiteni wa APR FC Mugiraneza Jean Baptiste bakunze kwita Migi yahagurukije abafana bayo aho yatsinze igitego ku mupira wari uvuye muri koruneri. Umukino ukaba wahise urangira ku nsinzi y’ikipe ya gisirikare.

Iyi nsinzi APR ibonye ikaba iyifashije kuguma ku mwanya wa mbere ku rutonde rw’agateganyo rwa Shampiyona y’igihugu y’umupira w’amaguru 2018/2019 n’amanota 51. Ku mwanya wa kabiri hariho Rayon Sports n’amanota 44 ikaba izigamye umukino aho izakina na Kiyovu Sports.

Uyu mukino ukaba wari ikirarane kuko wari gukinwa ku munsi wa 21 wa shampiyona. Ukaba wari wasubitswe kuko abakinnyi b’amakipe yombi bari bagiye gukinira ikipe y’igihugu ‘Amavubi’.

Undi mukino w’ikirarane wabaye ukaba wahuje Sunrise na AS Kigali ukaba warangiye amakipe yombi anganya igitego kimwe kuri kimwe. Indi mikino y’ibirarane izakomeza k’umunsi w’ejo tariki ya 28 Werurwe 2019 aho hateganijwe umukino ukomeye uzahuza Kiyovu Sports na Rayon Sports.

Nkurunziza Viateur @Bwiza.com

Izindi wakunda

Bwiza.com