bwiza.com
Ahabanza » Nyamasheke/ Karambi: Kutagira interineti, kimwe mu bikoma mu nkokora ireme ry’uburezi
Amakuru Mu mashuli

Nyamasheke/ Karambi: Kutagira interineti, kimwe mu bikoma mu nkokora ireme ry’uburezi

Ubuyobozi bw’ishuri ‘Collège officiel Mburabuturo’ riri mu Murenge wa Karambi mu karere ka Nyamasheke, ababyeyi barirereramo, abanyeshuri  n’abarezi babo, bavuga ko bahangayikishijwe bikomeye no kuba nta Interineti ihagera ngo aba bana babashe kwiga ikoranabuhanga, bakabibona nka kimwe mu bibangamiye cyane ireme ry’uburezi muri iri shuri.

Mu kiganiro na Bwiza.com, abarebwa n’iri shuri risanzwe ari iry’uburezi bw’ibanze bw’imyaka 12 ariko ryahawe amahirwe yo gucumbikira abana,bose bahurije ku kuba hari icyuho kiboneka mu myigire y’aba bana  ugereranije n’ahandi mu ikoranabuhanga,kuko mudasobwa zigera ku 105 bahawe na REB n’izindi 24 bahawe na MTN bazikoresha mu bindi ariko byagera ku ikoranabuhanga zikamera nk’aho ntacyo zibamariye.

Ntihemuka Eliezer wiga mu wa 6 yavuze ko  bababazwa cyane no kumva abana biga ahandi bakataje mu ikoranabuhanga,aho bakura kuri internet ibibazo bigendanye n’ibyo bazabazwa mu bizamini bya Leta,cyangwa ibisubizo bya bimwe mu bibazo ariko kuri bo bikaba bidashoboka,kuba barangiza nta cyo bazi ku mikoreshereze ya internet,kuba bagicungira ku gusoma ibitabo gusa na byo bidahagije ugereranije n’aho isi ya none igeze,n’ibindi ,akavuga ko bikibadindiza mu ireme ry’uburezi.

Ati  “Biratudindiza cyane rwose kuko hari ibyo abiga neza babona twe tutabona kandi niturangiza ayisumbuye ntituzagaruka  kubisubiramo nyamara byari kuri porogaramu twagombaga kubona nk’abandi. Tubona ko twiga nabi ikoranabuhanga kandi ari ryo rigenga isi ya none, tugasaba ko hakubakwa iminara ikomeye ituma tubasha kuryiga neza  ntidusigare inyuma.’’

Umuyobozi w’iri shuri Kwitegetse Alexis na we yemeza ko kutagira iminara ituma babona konegisiyo ya internet na rezo ya telefoni bihagije ari imbogamizi ikomeye ku mikorere y’ubuyobozi n’imyigire y’abana  kuko icyuho mu myigire y’ikoranabuhanga kigaragara n’amafaranga  ishuri ritanga mu kujya gushaka konegisiyo aho iri ngo babashe kohereza muri Minisiteri ibyo basabwa  byoherezwa hakoreshjwe ikoranabuhanga akomeje kuba umurengera.

Umuyobozi wa Collège officiel Mburabuturo, Kwitegetse Alexis

Ati “Hari nk’ibyo dusabwa Minisiteri iba idunekeyeho kandi ntitwabyohereza bikoresheje intoki no  kubikora bikaba bitinda,kuva hano kugera ahaboneka internet ihagije mu iTyazo mu murenge wa Kanjongo  no kugaruka k’uwahagiye n’ibimutungira yo ntibyajya munsi ya 15.000 umunsi umwe kandi yataye n’akandi kazi yagombaga gukora. Tekereza gukora nk’ibintu bisaba iminsi myinshi amafaranga dutakaza buri kwezi yakabaye agira ibindi akora bizamura ishuri.’’

Avuga ko nyuma y’uko REB ibahaye mudasobwa 105 na MTN yabahaye izndi 24 muri 2016 bayigeza ho iki kibazo ibizeza kugikemura ibaha umunara ku musozi bita Cyiya,ariko ubu ngo amaso yaheze mu kirere,bikaba bidashoboka kuvuga ireme ry’uburezi icy’ingezi ari cyo koranabuhanga kitahigwa neza n’abarimu batabasha gukora ubushakashatsi bakenera.

Cyagarutsweho mu nama yahuje ubu buyobozi n’ababyeyi baharerera,ubahagarariye Habinshuti Roger Papias asaba ko MTN yakora uko yari yabijeje,umunara ukaboneka abana babo bakiga ikoranabuhanga nk’uko babyifuza n’amafaranga make ishuri ribona ntashiriye mu kujya gushakisha internet kure.

Iki kibazo kitabangamiye iri shuri gusa ahubwo kinabangamiye amashuri yose 9 abanza n’ayisumbuye y’uyu murengen’ abaturage benshi b’imirenge yawo  na Cyato muri aka karere,ubwo Minisitiri w’ubutegetsi bw’igihugu ,Prof.Shyaka Anastase  yasuraga umurenge wa Karambi mu mpera z’icyumweru gishize nyuma y’uko  wari wanyuze mo abitwaje intwaro mu rukerera rwo ku wa 16 uku kwezi,aba baturage bamugaragarije impungenge baterwa no kuba badashobora guhamagara byihuse inzego z’umutekano igihe baba batewe kubera kubura rezo ya telefoni muri aka gace,abizeza ko kizwi kandi kiiye gushakirwa umuti byihuse.

Bavuga ko kutagira interineti ari icyuho mu burezi

 

Izindi wakunda

Bwiza.com
error: Alert: Ntabwo byemewe!!