bwiza.com
Ahabanza » Amerika yasabye u Burusiya kuvana vuba na bwangu abasirikare babwo muri Venezuela
Amakuru Politiki

Amerika yasabye u Burusiya kuvana vuba na bwangu abasirikare babwo muri Venezuela

Nyuma y’iminsi igera kuri itanu u Burusiya bwohereje abasirikare babwo muri Venezuela, Perezida wa Leta Zunze Ubumwe za Amerika, Donald Trump yabusabye kubavanayo vuba na bwangu.

Ku wa Gatandatu tariki ya 23 Werurwe 2019 nibwo indege ebyiri za gisirikare z’Uburusiya, zageze ku kibuga cy’indege cy’ingenzi muri Venezuela, amakuru akavuga ko zari zitwaye abasirikare babarirwa mu macumi ndetse n’ibikoresho byinshi.

Ubwo Perezida Trump yabazwaga kuri uyu wa Gatatu tariki 27 Werurwe 2019, nimba na Amerika izohereza abayo muri Venezuela kuhavana ab’u Burusiya, Trump yavuze ko ibintu byose bishoboka kandi ko u Burusiya buzi neza icyo Amerika ishobora gukora.

Nk’uko VOA ibitangaza, ngo ibi Trump yabitangarije abanyamakuru muri White House ari kumwe na Fabiana Rosales, umugore wa Juan Guaido, umukuru w’abatavuga rumwe n’ubutegetsi bwa Venezuela ndetse wanatangaje ko ari perezida w’inzibacyuho wa Venezuela.

Leta Zunze Ubumwe za Amerika, hamwe n’ibindi bihugu bitari bike, byemeza ko Guaido ari we perezida w’inzibacyuho, mu gihe u Burusiya bushyigikiye Perezida Nicolas Maduro.

Uburusiya busanzwe ari inshuti ya Venezuela, bwamaganye ibihugu by’amahanga kubera gushyigikira Juan Guaidó, watangaje ko ari we Perezida w’inzibacyuho wa Venezuela mu kwezi kwa mbere k’uyu mwaka wa 2019.

Izindi wakunda

Bwiza.com
error: Alert: Ntabwo byemewe!!