bwiza.com
Ahabanza » Ole Gunnar Solskjaer yagizwe umutoza wa Manchester United mu buryo buhoraho
Imikino

Ole Gunnar Solskjaer yagizwe umutoza wa Manchester United mu buryo buhoraho

Ikipe ya Manchester United yamaze kugira Ole Gunnar Solskjaer umutoza wayo mukuru mu buryo budasubirwaho nyuma yo gutoza iyi kipe amezi 4 nk’ umutoza w’agateganyo.

Uyu mutoza ukomoka mu gihugu cya Norway yatangiye gutoza Manchester United mu kwezi kw’ Ukuboza 2018, nyuma yo gusimbura Jose Mourinho wari umaze kwirukanwa kubera umusaruro mubi w’ikipe.

Kuri uyu wa Kane tariki ya 28 Werurwe 2019 ,nibwo ubuyobozi bwa Manchester United bwatangaje ko bamaze kumvikana n’uyu mutoza akabasinyira gutoza iyi kipe mu gihe cy’imyaka 3 iri imbere.

Umuyobozi wungirije wa Manchester United Ed Woodward yagize ati”Umusaruro uyu mutoza yagezeho kuva yafata iyi kipe nk’umutoza w’agateganyo mu k’Ukuboza 2018 birivugira” yakomeje avuga ko iki cyari cyo gihe kugira ngo agirwe umutoza mu buryo buhoraho.

Yagize ati” Usibye no kwitwara neza ndetse n’umusaruro mwiza, Ole yazanye ubunararibonye yaba ari umukinnyi cyangwa umutoza. Akaba afite n’ubushake bwo kuzamura abakinnyi bakiri bato ndetse yumva n’ indangagaciro z’ ikipe. Bityo rero akaba ariwe muntu nyawe ukwiye gukomeza gutoza Manchester United”

Uyu mutoza w’ imyaka 46 y’amavuko, yanabaye umukinnyi wa Manchester United mu myaka yashize aho yayifashije gutwara igikombe cya Champions league muri 1999. Ole akaba yaraje gutoza Manchester United avuye mu ikipe ya Molde y’iwabo muri Norway.

Kuva yaza muri Manchester United yayitoje imikino 19 mu marushanwa atandukanye atsindamo 14, anganya imikino 2 , atsindwa imikino 3. Akaba ahawe aka kazi nyuma y’ amajwi menshi y’abafana,abakiniye iyi kipe mu myaka yatambutse asaba ubuyobozi bwa Manchester United kumugira umutoza mukuru.

Uyu mutoza akaba yishimiye aka kazi yahawe ndetse anashimira ubuyobozi bw’ikipe bwamugiriye icyizere. Manchester United ikaba iri kurwanira kuza mu makipe ane ya mbere aho iri ku mwanya wa 5 n’amanota 58.

Iyikipe kandi ikaba yarageze mu mikino ya 1/4 cya Champions league aho izacakirana na FC Barcelona muri Mata 2019.

Nkurunziza Viateur @Bwiza.com

Izindi wakunda

Bwiza.com
error: Alert: Ntabwo byemewe!!