bwiza.com
Ahabanza » RIB yerekanye ucyekwaho gutema inka 12 z’umuturage w’i Nyabihu
Amakuru Politiki

RIB yerekanye ucyekwaho gutema inka 12 z’umuturage w’i Nyabihu

Urwego rw’Igihugu rw’Ubugenzacyaha (RIB) rweretse itangazamakuru umugabo ruvuga ko rwataye muri yombi ku wa Gatatu tariki ya 27 Werurwe 2019, ucyekwaho gutema inka 12 z’umuturage witwa Ndabarinze Kabera  wo mu karere ka Nyabihu.

Kuri uyu wa Kane tariki ya 28 Werurwe, nibwo RIB yerekanye uyu mugabo w’imyaka 39 y’amavuko, akaba ari impunzi y’Umunye Congo, iba mu nkambi ya Kiziba mu karere ka Karongi. Aremera ko ariwe watemye izo nka yihimura kuri Kabera.

Yavuze ko yavuye mu Karere ka Karongi, arara i Nyabihu, azitema ahagana saa Mbiri n’igice z’ijoro (20:30) akoresheje umuhoro yari yaguze, aranawutyajisha. Mbere yo gukora iki gikorwa benshi bagaye ngo yabanje kunywa inzoga (waragi) nyinshi.

Yagize ati “Nari navuze ngo ndafata umutwa abe ari we njyanayo azintemere, ubwo mbonye ntawe mbonye naragiye mfata Waragi ebyiri niyobya ubwenge kuko ntabwo ubukene bwari kunkubita izanjye azoroye aho[…]”.

Yavuze ko yatemye izi nka abitewe n’umujinya w’uko yagabiye Kabera, amwishyuje inyiturano aramukubita ngo binamusigira ubumuga, ndetse ko byanamuteye ubukene. Ati “Navugaga ngo yarankenesheje nanjye mfata umwanzuro utari mwiza”.

Yakomeje asobanura uburyo yakozemo iki gikorwa cyo gutema izi nka za Kabera akoresheje umuhoro mushya. Ati “Naragiye ngura umuhoro natyajishije ku mashini njyayo[mu ishyamba rya Gishwat], naraharaye mbyuka nko mu saa moya njya mu ishyamba aho zari ziri, mu gihe agiye nka saa kumi n’ebyiri n’igice nanjye bibaye saa mbili n’igice ndazitema[…]”.

Umuvugizi w’Urwego rw’Igihugu  rw’Ubugenzacyaha, Mbabazi Modeste, yavuze ko mu makuru bafite, uyu mugabo ucyekwaho gutema inka ngo yashakaga nyirazo amubuze yihimura ku matungo.

Mbabazi yatanze inama yo kwirinda ibikorwa nk’ibi byo kubika inzika zo kugera aho kwihimura. Ko mu gihe hari abashyamiranye bajya bitabaza inshuti n’abavandimwe byananirana bakagana inkiko.

Izindi wakunda

1 Igitekerezo

Burera: Abari bitwaje imihoro n’udufuni batemye abantu babiri - bwiza.com 29/03/2019 12:46 pm at 12:46 pm

[…] Indi nkuru y’ubugizi bwa nabi i Nyabihu: Kanda hano uyisome […]

Subiza

Tanga Igitekerezo

Bwiza.com
error: Alert: Ntabwo byemewe!!