bwiza.com
Featured Honorable SEBABA Kwibuka

Hon. Sebaba aribuka ku nshuro ya 25

1994-2019, imyaka 25 irashize jenoside yakorewe abatutsi mu Rwanda ibaye. Hari mu ijoro ryo ku 6-7/04, 1994 ubwo indege yari itwaye uwari Perezida w’u Rwanda, Juvénal Habyarimana yahanurwaga abari bayirimo bose bakayigwamo.

Icyakurikiyeho ni uko bariyeri zashinzwe hose mu gihugu, hicwa abatutsi n’abahutu batari bafite ibitekerezo by’ubuhezanguni bakabakaba miliyoni imwe. Ibi kwari ukwibukiranya gusa kugira ngo abazavuka n’abakiri bato bajye bahora bibuka iby’ayo mateka mabi, ashaririye yabaye mu gihugu cyacu.

Tumaze imyaka 25 twibuka. Yego! Duhora twibuka izo nzirakarengane zishwe zimwe zizira uko zavutse izindi zizira ibitekerezo byiza byazo. Kwibuka bituma hasubizwa amaso inyuma, hakarebwa iyo u Rwanda rwavuye kuko rwari rwarasenywe bikomeye mu nzego zose, n’aho rugeze ubu mu nzira yo kwiyubaka. Muri icyo cyerekezo hagashimangirwa gahunda y’ubumwe n’ubwiyunge no kugarurira icyizere abarokotse ubwo bwicanyi no gusaba abakiriho kwirinda icyatuma ubwicanyi (Jenoside) bwongera kubaho.

Kwibuka kandi byagombye kuba umwanya wo kuzirikana ibyo byose byagezweho no kureba imbere kure ibiteganyijwe cyane mu rwego rw’umutekano, imibereho myiza, ubutabera n’ubukungu. Ibi byose mvuze mu gihe byaba bigeze ku kigero cyo hejuru bikaba aribyo bigarurira ikizere igihugu, abanyarwanda bose. Kugira ngo ibi bigerweho n’ibintu byoroshye kandi bigoye ariko bishoboka. Biroroha kuko bisaba ubushake ariko cyane cyane ubwa politiki aho abagize uru rwego bagomba kunoza iyi gahunda ntihabeho kuyiharira ahubwo ikagirwamo uruhare n’abo bireba bose. Inyungu nziza y’ubu bufatanye ni uko hagenderwa ku bitekerezo bimwe kandi byumvikanyweho bituma bose bagira uruhare mu kubishyira mu bikorwa.

Birakomeye kandi kuko burya mu gihugu hatabura abantu batumva n’abumva bitinze. Bene abo bantu nibo bashobora kudindiza igihugu kugera ku ntego nziza kandi bakaba baboneka mu nzego zose haba mu buyobozi haba ndetse no mu baturage. None se muragira ngo abantu ni shyashya? Oya pe! Mu buyobozi twagiye twumva abaketsweho ingengabitekerezo ya jenoside benshi bagiye babihanirwa. Hakaba n’abandi babifite iy’ubundi bwoko ariko ntaza kugereranya ibitagereranywa bishobora kubangamira inzira yo kwiyubaka y’ubumwe n’ubwiyunge.

Ntanze nk’urugero, nko mu itangwa ry’imirimo cyangwa mu isaranganywa ry’ubukungu bw’igihugu aho ababishinzwe ntabwo bareba ko hakirimo icyuho? Muzi ukuntu kaminuza zihenda ababyeyi birya bakikokora bakimaraho utwabo bagakena kubera gufata amadeni hirya no hino. Umubyeyi ufite abana batanu barangije kwiga kamunuza ugasanga bamaze imyaka isaga icumi bari mu bushomeri barabuze akazi mu gihe hari abasamirwa mu kirere bakabona imirimo byihuse.

Aha inzego bireba n’abashomeri ntibahwemye kwerekana ko haba akarengane mu itangwa ry’umurimo. Harya umuyobozi ukora bene ibyo utagendera ku kuri we yaba afite iyihe ngengabitekerezo? Ni uko bitavugwa ariko bene abo bantu bagendera ku cyenewabo, aho baturutse yewe n’ubwoko ndetse. Abo badindiza gahunda nziza z’igihugu kubwanjye nkumva baba bahemukira igihugu bakaba ndetse mu gihe batahuwe baba bakwiriye kubiryozwa kimwe nk’abandi bagizi ba nabi bose.

Kugira ngo nshimangire ibi mvuga, hazakorwe ubushakashatsi bwigenga maze tumenye imibare y’abarangije kaminuza, igihe barangirije n’ibyo igihugu cyangwa ababyeyi babashyizeho, batubwire taux de chômage uko ingana, ikibitera maze banatange umuti batekereza watuma icyo kibazo gikemuka.

U Rwanda rukeneye abarureberera kure kuko aribyo bizatuma iterambere ryihuta. Abasoma iyi nyandiko ntimutekereze ko nataye umurongo kuko kubaka igihugu cyane cyane nk’iki cyacu cyababaye, cyakomeretse bisaba kwigengesera cyane hirindwa ikintu cyose gitoneka abakigize.

Ngarutse ku kwibuka, ndifatanya n’abantu bose babuze ababo muri kiriya gihe. Ndibuka kandi inshuti zanjye twiganye mu mahanga zatashye zikagwa mu Rwanda. Nigeze kuvuga hejuru ko burya mu buzima habamo ibiryoha n’ibirura ( ibisharira). Hamwe urishima ahandi ugashavura.

Njye mu matariki nk’aya abanziriza Jenoside yakorewe Abatutsi muri Mata 1994 , aho nari ndi nari mu byishimo bikomeye kubera uko urugamba rwari rurimbanije nizera ko iyo twari mu mahanga twari twegereje cyangwa turi hafi gutaha. Ariko ibyari ibyishimo ntibyatinze byaje guhinduka amarira kubera ibyakurikiyeho nagiye nkurikura ku maradiyo n’amateleviziyo, imirambo insanga mu migezi y’ahari iwacu ifite amasoko cyangwa inyura mu Rwanda.

Ndibuka umuntu umwe wigeze kuvuga ngo ahari ikibazo iruhande rwacyo haba igisubizo, nanjye nti ahari amarira n’agahinda iruhande rwabyo haba hari n’ibyishimo. Reka twese dufatanye mu gutuma u Rwanda rwacu turushaho kurutunganya kugira abazadukomokaho bazishimire kuzaruturamo bishimira kuba bene kanyarwanda.

Abanyarwanda mwese muhumure kuko hari utanga ihumure, kandi akomora inguma ziboneka mu mitima. Ku bemera bibliya ijambo riboneka muri zaburi 147: 3 ribafashe muri ibi bihe bikomeye byo kwibuka!

Hon. Sebaba

Izindi wakunda

Bwiza.com
error: Alert: Ntabwo byemewe!!