bwiza.com
Amakuru Politiki

Yahaye akazi abagabo batanu ngo bamukosorere umukunzi birangira bamwivuganye

Umukobwa w’imyaka 21 mu gihugu cya Kenya yahaye abagabo batanu akazi ko gukosora umukunzi we nyuma yo kugirana amakimbirane, birangira abo bagabo bamwishe nk’uko Urukiko Rukuru rwa Nyeri rwabyumvise kuri uyu wa Kane, itariki 28 Werurwe.

Urukiko rwabwiwe ko Esther Wambui, umunyeshuri kuri Utalii College, iherereye Nairobi, yateguye kwica umukunzi we, Dennis Okumu w’imyaka 23 wari umushoferi wa taxi muri Githurai.

Umucamanza Abigail Mshilla yumvise ko Wambui afatanyije na nyina, Rosemary Nyawira n’undi wo mu muryango wabo, Micheal Muriuki, bishe Okumu mu ijoro ryo kuwa 03 Gashyantare 2018 ahitwa Karatina nk’uko iyi nkuru dukesha Daily Nation ikomeza ivuga.

Umupolisi ushinzwe iperereza, Cpl Eliud Odhiambo, yasobanuriye urukiko ko Wambui yajyanye umukunzi we babyaranye umwana iwabo kwa nyina mu giturage ahitwa Karatina, ariko agambiriye kumukosora kubera ko ngo nawe yajyaga amuhohotera amukubita.

Nyina w’uyu mukobwa ukora ku Bitaro bya Karatina we yemeye icyaha nk’uko Odhiambo avuga. Nyakwigendera ngo akaba yari yariye kwa nyirabukwe, akaza kwicwa ubwo yari aherekejwe agiye aho yagombaga kurara.

Umurambo we wateraguwe ibyuma warajugunywe bawusangana ibikomere bitanu by’ibyuma mu ijosi, amaso yavanwemo ndetse n’amenyo amwe y’imbere bayakuye.

Odhiambo yakomeje avuga ko uyu muryango wari wakodesheje abagizi ba nabi batanu ngo bakosore nyakwigendera ariko bikaza kurangira nabi umuntu yishwe. Nyuma yo kumwica, umukobwa na nyina ngo bishyuye amashilingi 3,000 uwitwa Muriuki utwara boda boda ngo ajye kujugunya umurambo ahitwa Kirimara.

Odhiambo akaba akomeza avuga ko igipolisi cyariwe urwara n’umwe mu bantu bari bahawe akazi ko gukosora Okumu bituma abakekwa batabwa muri yombi, aho biteganyijwe ko urubanza ruzatangira ku itariki 04 Kamena.

 

 

Izindi wakunda

Bwiza.com