bwiza.com
Ahabanza » APR FC itsinze Sunrise biyifasha gushimangira umwanya wa mbere
Imikino

APR FC itsinze Sunrise biyifasha gushimangira umwanya wa mbere

 


Ibitego bibiri bya Nshuti Dominic Savio na Byiringiro Lague bifashije ikipe ya APR FC kwegukana amanota atatu nyuma yo gutsinda ikipe ya Sunrise mu mukino w’ikirarane bari bafitanye.

Ni umukino wabereye kuri sitade ya Kigali I Nyamirambo aho APR ariyo yari yakiriye umukino.Wari umukino w’ikirarane cyo ku munsi wa 22 wa shampiyona utarabereye igihe kubera ko abakinnyi ba APR bari bitabiriye imikino y’ikipe y’igihugu ’ Amavubi’.

Uyu mukino watangiye ikipe ya APR isatira mu buryo bukomeye bituma ibona penaliti. Umukinnyi Hakizimana Muhadjiri akaba atasekewe n’amahirwe aza kuyihusha.

Ntabwo APR yacitse intege, ahubwo yakomeje kotsa igitutu Sunrise, bituma Nshuti Dominic Savio atsinda igitego ku munota wa 31 . Igice cya mbere cyarangiye APR ariyo iyoboye umukino mu buryo bugaragara.

Igice cya kabiri cyatangiye amakipe yombi asatirana . Ikipe ya Sunrise yagerageje kwishyura igitego ariko ba myugariro ba APR bakayibera ibamba. Ibintu byaje guhinduka ku munota wa 70 aho Byiringiro Lague yaje gutsinda ikindi gitego maze abafana bajya mu bicu.

Nyuma yo gutsinda uyu mukino, APR ihise igira amanota 54 ikomeza kuguma ku mwanya wa mbere muri shampiyona.Ikaba irusha Rayon Sports iyikurikiye amanota 7, gusa Rayon Sport iracyafite umukino w’ikirarane izakina kuwa 31 Werurwe 2019 na As Kigali.

APR izagaruka mu kibuga tariki ya 20 Mata 2019 aho izakina na Rayon Sports naho Sunrise izakina na Muhanga tariki ya 21 Mata 2019.

Nkurunziza Viateur @Bwiza.com

Izindi wakunda

Bwiza.com
error: Alert: Ntabwo byemewe!!