bwiza.com
Ahabanza » Mazimpaka Andre yahembwe nk’umukinnyi witwaye neza muri Rayon Sports mu kwezi gushize
Imikino

Mazimpaka Andre yahembwe nk’umukinnyi witwaye neza muri Rayon Sports mu kwezi gushize

 

Umunyezamu wa Rayon Sports Mazimpaka Andre yatowe nk’umukinnyi witwaye neza mu ikipe ya Rayon Sports mu kwezi kwa Gashyantare ahigitse Habimana Hussein na Niyonzima Olivier bakunze kwita ‘Sefu’.

Ni umuhango wabaye kuri uyu wa gatanu tariki ya 29 Werurwe 2019, ukabera ku kibuga cy’imyitozo cya Rayon Sports giherereye mu Nzove ubwo imyitozo yari irangiye. Iki gihembo uyu munyezamu yahawe kikaba gifite agaciro k’ibihumbi 100.

Igikorwa cyo guhemba umukinnyi wa Rayon Sport witwaye neza buri kwezi cyatangijwe n’itsinda ry’abafana rya ‘’March Generation’’ kikaba giterwa inkunga n’uruganda rwa Skol.

Mazimpaka yegukanye iki gihembo nyuma yo kwitwara neza mu kwezi gushize , aho mu mikino icyenda yakinnye yinjijwe ibitego bibiri gusa.

Iki gikorwa cyo guhemba umukinnyi wa Rayon Sports witwaye neza buri kwezi, gifasha abakinnyi gukina bafite ishyaka kandi kikabongerera imbaraga zo gukomeza kwitwara neza dore ko buri mukinnyi aba yifuza kucyegukana. Ibi bikaba bifasha n’ikipe gukomeza kwitwara neza mu mikino itandukanye.

Ubwo iki gihembo giheruka gutangwa, cyari cyegukanwe na rutahizamu wa Rayon Sport Michael Sarpong mu kwezi kwa Mutarama. Mazimpaka yageze muri Rayon Sport umwaka ushize. Yakiniye amakipe atandukanye harimo Musanze Fc na Mukura Victory Sport.

Rayon Sport iri kwirukanka inyuma ya shampiyona, iragaruka mu kibuga aho izaba ihanganye na AS Kigali mu mukino w’ikirarane kuri iki cyumweru tariki ya 31 Werurwe 2019.

Kugeza ubu, Rayon ikaba iri ku mwanya wa kabiri ku rutonde rwa shampiyona n’amanota 47. Uru rutonde ruyobowe na APR FC n’amanota 51.

Nkurunziza Viateur @Bwiza.com

Izindi wakunda

Bwiza.com
error: Ntibyemewe