bwiza.com
Imikino

Rayon Sports inganyije na AS Kigali byongerera APR FC amahirwe yo kwegukana shampiyona

 

Ikipe ya Rayon Sports inaniwe gutsinda AS Kigali aho amakipe yombi anganyije igitego kimwe kuri kimwe bituma Rayon Sport irushwa amanota atandatu ku rutonde rwa Shampiyona.

Uyu mukino wahuje Rayon Sport na As Kigali wabereye kuri stade ya Kigali i Nyamirambo. Wari umukino w’ikirarane cyo ku munsi wa 22 wa shampiyona utarabereye igihe kubera ko abakinnyi b’amakipe yombi bari bitabiriye imikino y’amakipe y’ibihugu.

Uyu mukino wari ukomeye cyane ku mpande zombi kuko Rayon Sports yashakaga kuguma kotsa igitutu APR FC ku rutonde rwa shampiyona. Mu gihe umutoza wa AS Kigali Masudi Djuma atashakaga gutsindwa n’ikipe yahoze atoza.

Rayon Sport niyo yafunguye amazamu ku munota wa 30. Aho umukinnyi Mutsinzi Ange Jimmy yatsinze igitego mu gice cya mbere ndetse igice cya mbere kirangira ikipe ya gikundiro ariyo iyoboye umukino.

Mu gice cya kabiri ikipe ya As Kigali yaje ishaka kwishyura igitego ariko Rayon Sport ikayibera ibamba.

As Kigali yaje kwishyura igitego ku munota wa 67 gitsinzwe na Rutahizamu wayo Frank Kalanda. Umukino wakomeje ubona Rayon Sport isatira mu minota ya nyuma ariko ntacyo byatanze kuko amahirwe babonye ntabwo bayabyaje umusaruro.

Nyuma yuko As Kigali ihagamye Rayon Sport , yahise igira amanota 48 iguma ku mwanya wa kabiri . Kugeza ubu APR niyo iyoboye urutonde rwa shampiyona n’amanota 54 aho irusha Rayon amanota 6.

Shampiyona igiye gusubikwa kubera ko abanyarwanda bagiye kwinjira mu cyumweru cyo kwibuka Jenoside yakorewe Abatutsi 1994 aho izagaruka Rayon Sports icakirana na APR FC tariki ya 20 Mata 2019.

Nkurunziza Viateur @Bwiza.com

Izindi wakunda

Bwiza.com
error: Alert: Ntabwo byemewe!!