bwiza.com
Amakuru Politiki Ubukungu

Imashini zatwaye leta akayabo ka miliyari 3,7 zimaze imyaka isaga 3 zitarakoreshwa icyo zaguriwe

Imashini zaguzwe akayabo ka miliyari 3,7 y’Amanyarwanda zigomba gukoreshwa mu gutunganya umusasruro w’imyumbati zimaze imyaka isaga 3 zidakoreshwa icyo zaguriwe none abagize inteko ishinga amategeko barabibonamo guteza leta igihombo bagasaba ababigizemo uruhare gukurikiranwa.

Kuwa Gatatu ushize, nibwo minisitiri w’ubucuruzi n’inganda, Soraya Hakuziyaremye, yageze imbere y’Inteko Ishinga Amategeko agiye gusubiza ibibazo 23 byanditse byazamuwe muri Gashyantare na Komite y’Inteko Ishinga Amategeko ishinzwe Ubuhinzi, Ubworozi n’Ibidukikije.

Mu bibazo byazamuwe, harimo icyo kumenya impamvu sosiyete Tapioca Starch Processing Company (TASCO) iherereye mu Karere ka Bugesera idakora n’akayabo k’amafaranga yashowemo.

Minisitiri Soraya yasobanuye ko nubwo minisiteri y’imari n’igenamigambi ry’ubukungu yaguze imashini, nta nyubako uruganda rwari gukoreramo yari ihari.

Kuva mu 2015, imashini zaguzwe ngo zikaba zibitse mu bubiko butari ubwa leta kandi yishyura amafaranga menshi

Minisitiri Soraya ati: “ Umushinga wagombaga kongerera agaciro umusaruro w’imyumbati. Wari umugambi wa minisiteri y’ubuhinzi. Minisiteri y’ubuhinzi yateguye umushinga mu 2013, minisiteri y’imari itanga isoko igura imashini mu 2015 ku kigo cy’Umunya-Korea y’Epfo. Kugeza ubu nta nyubako igenewe uruganda ihari.”

Yakomeje agira ati: “Twakomeje gushaka abashoramari bo kubaka urwo ruganda ariko biranga. Tuzanagenzura niba imashini zigishobora gukora dukomeze no gushaka umushoramari uzubaka uruganda.”

Ibi nibiramuka byanze, Minisitiri Soraya yavuze ko Guverinoma ishobora gushyira izo mashini mu cyamunara. Ati: “Dufite amezi atatu yo kwemeza aho tuzashyira izo mashini no kumenya niba umushinga ugikeneye umushoramari.”

Abadepite bibajije ukuntu minisiteri y’imari yafashe icyemezo cyo kugura imashini nta nyubako, maze basaba bakomeje ko ibi bintu byakurikiranwa abantu bateje igihombo leta bakabiryozwa.

Hon. Veneranda Nyirahirwa ati: “Ndibaza ukuntu abantu bashobora kugura imashini zihenze gutyo mbere yo kumenya aho bazazishyira. Ni iki wakora muri situation nk’iyi? Ni bande bibazwa? Muzareka guverinoma ihombe gutyo gusa?”

Yongeyeho ko nubwo minisitiri w’ubucuruzi yasobanuriye abadepite umuzi w’ikibazo nta gisubizo gisobanutse kuri iki kibazo.

Naho Hon. Diogène Bitunguramye, we yasabye ko hakorwa iperereza kuri iki kibazo no gukurikirana ngo hamenyekane abantu bose babigizemo uruhare kandi bazahanwe hakurikijwe ibiteganywa n’amategeko.

Minisitiri w’ubucuruzi akaba yavuze ko hari ubugenzuzi bw’imbere buri gukorwa ngo hamenyekane inganda zitagikora, ahishura ko ubugenzuzi bwatangiye muri Werurwe buzageza kuri raporo yo muri Nzeri izagaragaza neza ibibazo bikigaragara mu rwego rw’inganda ikazamenyesha Guverinoma igikwiye gukorwa.

 

Izindi wakunda

Bwiza.com
error: Alert: Ntabwo byemewe!!