bwiza.com
Ahabanza » Iyo Imana iba iha agaciro gacye umugore, Yezu ntiyari kubyarwa n’umugore- Ingabire Immaculée‏
Amakuru Iyobokamana

Iyo Imana iba iha agaciro gacye umugore, Yezu ntiyari kubyarwa n’umugore- Ingabire Immaculée‏

Impirimbanyi mu kurwanya ruswa n’akarengane akaba n’Umuyobozi wa Transparence International Rwanda, Ingabire Marie Immaculée, avuga ko abumva nabi ijambo ry’Imana bakemeza ko umugore asuzuguritse kubera ko yavutse mu rubavu rw’umugabo, ataribyo.

Ingabire yabitangaje abicishije ku rukuta rwe rwa Twitter, mu bitekerezo yagiye ahanahana na bamwe mu basaga ibihumbi bibiri bamukurikiraho, aho bamwe bagaragazaga akamaro k’ubwuzuzanye hagati y’umugabo n’umugore, mu gihe abandi bagendera mu byanditswe muri bibiliya bakagaragaza ko umugore ntacyo ashoboye.

Uwitwa Mukiyehe, yagize ati “Mu gitekerezo cy’irema Imana yaremye umugabo kuko ariwe muntu wari ukenewe ibona ko umugabo azicwa n’irungu imuremera umugore, Urumva umugore aje kuba igikoresho cyo gushimisha umugabo. Ubwo agaciro aha karihe?

Mu kumusubiza, Ingabire yagize ati “Ahubwo Imana yaremye umugore isanze umugabo atikwiye ku buryo yabaho wenyine! Kuvuga ngo umugore arasuzuguritse kubera ko yavuye mu rubavu rw’umugabo sibyo. None se ko byarangiye umugabo ava mu nda y’umugore ndetse ayimazemo amezi Icyenda yose?

Akomeza avuga ko amagambo atesha umugore agaciro uyasanga mu isezerano rya kera kubera umuco w’abayahudi. Agashimangira ko n’ubwo abantu bemera ijambo ry’Imana, bakwiye no kuzajya bashyiramo ubushishozi.

Ati “Twese Imana turayemera ariko tugomba kwemerana ubushishozi no gushyira mu gaciro. Ababyemera batyo ni ubuyobe bukabije. Hari ubwo twitiranya ijambo ry’Imana n’umuco n’imyumvire by’abagabo banditse Bibiliya. Ibintu nka biriya ntaho wabisanga mu Isezerano rishya[…]”.

Ingabire avuga ko Imana yemera itavangura, ati “Imana nemera ntivangura abagore n’abagabo . Twese iduha agaciro kangana kuko yaturemye mu ishusho yayo. Iyo Imana iba iha agaciro gacye umugore, Yezu ntiyari kubyarwa n’umugore”.

Ku wa Gatandatu w’icyumweru gishize ubwo Minisitiri w’Intebe, Dr Ntirente Edouard yasozaga ku mugaragaro ibirori byo kwizihiza Umunsi Mpuzamahanga w’Umugore muri uyu mwaka wa 2019, yavuze ko iterambere ry’Umuryango n’iry’igihugu ritagerwaho, hatabayeho ugufatanye hagati y’abagore n’abagabo.

Yagize ati “Twemeza nta gushidikanya ko guha amahirwe angana abagore n’abagabo, kimwe ndetse no guha amahirwe angana abana b’abakobwa n’abana b’abahungu, bigira uruhare rugaragara mu guteza imbere inzego zose z’ubuzima bw’Igihugu icyo ari cyose”.

Ku bwa Ingabire na we agashimangira ko iyo Imana irema umugabo gusa cyangwa umugore gusa, itari kuba iremye abantu. Avuga ko  umugore cyangwa umugabo wenyine atabasha kororoka. Imbaga y’abantu nayo ngo ntiyari kubaho.

Izindi wakunda

Bwiza.com
error: Alert: Ntabwo byemewe!!