bwiza.com
Ahabanza » UN: Abaturage barenga miliyoni 113 bugarijwe n’ikibazo cy’inzara ku Isi
Ubuzima

UN: Abaturage barenga miliyoni 113 bugarijwe n’ikibazo cy’inzara ku Isi

 

Abaturage barenga miliyoni 113 mu bihugu bigera kuri 53 ku isi bugarijwe n’ikibazo cy’inzara mu buryo bukomeye bitewe n’ibibazo by’intambara, imihindagurikire y’ikirere n’ibindi.

Muri raporo yasohowe n’ ishami ry’umuryango w’Abibumbye ry’ita ku biribwa n’ ubuhinzi FAO( Food and Agriculture Organisation) , igaragaza ko ibihugu nka Yemen, Repubulika Iharanira Demokarasi ya Congo, Afghanistan na Syria aribyo bihugu byugarijwe mu buryo bukomeye dore ko byihariye bibiri bya gatatu by’ibihugu bifite ikibazo cy’inzara ku isi.

Umuyobozi ushinzwe ibikorwa by’ubutabazi muri FAO, Dominique Bourgeon yatangarije AFP ko ibihugu bya Afrika aribyo byibasiwe cyane kuko abaturage bagera kuri miliyoni 72 bose bafite inzara ikabije.

Iyi raporo igaragaza ko ibibazo by’intambara, umutekano muke, amakimbirane, ubukungu budahamye n’ihindagurika ry’ibihe nk’izuba ryinshi n’imyuzure aribyo biri ku isonga mu gutera ikibazo cy’inzara mu baturage.

Mu bindi bibazo byagaragajwe n’iyi raporo bitera inzara harimo kuba ibihugu byinshi bifite ubukungu bushingiye ku buhinzi aho budatanga umusaruro uhagije. Ikindi kibazo ni uko hari ibhugu bicyakira impunzi nyinshi zivuye mu bihugu birimo intambara.

Uyu muryango kandi ugaragaza ko kubera ibibazo by’umutekano muke birikwiyongera muri Venezuela ,Syria n’ahandi, bizakomeza guteza ikibazo cy’ubukene n’imibereho mibi mu baturage.

Ikibazo cy’inzara kikaba gihangayikishije cyane dore ko gikomeje kuzamura umubare munini w’abana bafite imirire mibi ndetse n’iterambere ry’igihugu rikadindira.

Nkurunziza Viateur @Bwiza.com

Izindi wakunda

Bwiza.com
error: Ntibyemewe