bwiza.com
IBITEKEREZO INKURU TWABAHITIYEMO

Ijisho riramutse rihorewe irindi, abatuye isi bose bakwisanga ari impumyi- Amwe mu magambo Gandhi yasize avuze

Mahatma Gandhi

Mbere y’uko mbagezaho amawe muri ayo magambo y’ubwenge, reka mbanze mbabwire muri make uyu mugabo uwo ari we. Ubusanzwe ni umuhindi witwa Mohandas Karamchand Gandhi, wavutse tariki ya 2 Ukwakira, 1869 yitaba Imana tariki ya 30 Mutarama 1948. Yabaye impirimbanyi ya politiki mu gihugu cye, aharanira ubwigenge arwanya ubukoloni bw’Abongereza.

Akoresheje inzira yo kutubahiriza amategeko no gusaba abahindi kutubaha ubwo butegetsi ariko mu mahoro nta bikorwa by’urugomo bibaye yaje kugera ku ntego ye ubuhindi bubona ubwigenge muri icyo gihe ahandi mu bindi bihugu bahaniraga ubwigenge hakoreshejwe ibikorwa by’intambara, uburyo Gandhi yakoresheje bwaje kwiganwa n’ahatari hake

Muri urwo rugendo rwe, Gandhi yagiye avuga amagambo akomeye y’ubwenge nzajya ngenda mbagezaho amwe muri yo uko nshoboye. Umunyarwanda niwe wavuze ngo utaganiriye na se ntamenya ibyo sekuru yasize avuze. Ibyo ni ukuri kwambaye ubusa kuko urwo ruhererekane rw’ibyavuzwe n’abakuru, bimenyeshwa urubyiruko kugira ngo narwo ruzabimenyeshe abana babo bityo bityo kugeza ku mperuka y’isi.

Njye  ndi umusaza gusa, si ndi so wawe ntan’icyo dupfana usibye ubunyarwanda, utagira ngo Ghandi ni data kuburyo naba ngiye kukugezaho ibyo yasize ambwiye. Icyo nzi cyo kubera imyaka mfite ndakubyaye kandi mu muco wacu kuva kera, tutaravangirwa, umuntu mukuru wese yafatwaga nk’umubyeyi. Mureke mbabwire, umuswahili niwe wavuze ngo ” kinywa ca muzehe kinanuka lakini hakiseme uwongo” ngo akanwa k’umusaza karanuka ariko ntikanuka.

Ntabatindiye mureke turebe ibyo yavuze, amagambo nawe wakwishimira kuko yuvuze umuri. Uko ibihe bizajya bidukundira tuzajya tubagezaho amwe mu magambo ya Gandhi.

Ijisho riramutse rihorewe irindi Jisho, byarangira abatuye isi bose ari impumyi

Aha uyu musaza yigishaga abaturage kwirinda kwihorera kuko ntacyo bimaze kuko ikibi wifuriza cyangwa ukorera mugenzi wawe birangira amaherezo nawe bikugezeho. Wica mugenzi wawe amaherezo nawe bikazakugeraho kuko nta gahora gahanze. Wicira umuntu nawe bakazakwicira uwawe. Wifuriza ikibi mugenzi wawe ejo nawe bakakwifuriza.

Noneho niba ari uko bimeze, kuki abantu batareka kugirira nabi abandi kandi nabo bafite urubategereje? Abo bagambirira ibibi mu mitima yabo no gushaka guhonyora no guhohotera ikiremwamuntu kubera ko badahuje ibitekerezo, ubwoko, ibara ry’uruhu n’izindi mpamvu zigayitse zerekana ubugwari mu bwonko, nibyo Gandhi agaya yerekana ko ubikora yangiriza umubiri n’umutima bya mugenzi we, agasanga ibyo bikomeje abantu bose bashira hadasigaye n’umwe harimo n’ababikoze. Aha ukibaza unobora ijisho ry’undi inyungu akuramo kandi nawe bazarinobora isi ikarangira abantu bose ari impumyi.

Reka tuve ku buhumyi bw’umubiri, butuma umuntu atabona, ariko ubuhumyi bubi n’ubwo mu bwonko no mu mutima. Kuko umuntu wese uhohotera undi, umugirira nabi amukomeretsa, amwicira aba ari we mpunyi nyakuri kuko aba akora ibyo nawe azi neza akamutegereje kandi aba ahemukiye igihugu cye n’abazavuka nyuma.

Nawe se umugabo w’igikwerere wicara mu biro bye agafata umwanya wo kugirira nabi ikiremwa cy’Imana, akabitegura ashishikaye, akanabikorera ingengo y’imari ( imisoro y’abaturage), agafata igihe cyo gutekereza kumena amaraso murumva ko hari impumyi irenze iyo?

Igitangaje ni uko ukora ibyo, aba afite imyaka y’amavuko nk’iyanjye cyangwa irenze kuburyo niyo atakwicwa yatwarwa n’uburwayi maze akitaba shitani akibanira na lusifero iteka ryose kuko uwo adashobora kwicara iburyo bwa Data! Amateka akaba akunze kwerekana ko bene izo mpumyi bakunze kuzirimbura nazo ubwazo hagamijwe guhisha ibimenyetso. Ikindi kibabaje ni uko igihe kigera iyo bataguhitanye, iyo bakurambiwe cyangwa wakoze amakosa nko kunanirwa gukora mishoni ( mission) neza, ushyirwa ku gatebe kandi waricaga ugakiza.

Ugasigarana ubwoba buhoraho muri wowe, wikanga igihise cyose, ukarara rwa ntambi nta bitotsi kuko wabaye rukaraba nkaba. Imizimu yose y’ikuzimu ikagusura amanywa na ninjoro ikakubuza amahwemo kwibutsa ba basaza, ababyeyi, abasore n’unkumi, impinja, abaturage b’ingeri zose wishe.

Niba twizeye ibyavuzwe na Gandhi, kugira umuntu impumyi biganisha kugutuma isi yose yizura impumyi hadasigaye n’umwe, ni gute wowe usoma iyi nkuru waharanira kuba iki?

Ku bemera bibiliya, Imana niyo yivugira iti “

Dore uyu munsi nshyize imbere yawe urupfu, amahirwe n’ubugingo ” Amahitamo ni aya buri wese! Waba wariyemeje guhitamo urupfu? Ni uburenganzira bwawe kuko warangije guhuma kera. Waba se warahisemo amahirwe n’ubugingo? Wahisemo neza kuko urahirwa kandi ingororano yawe iragutegereje!

Nsoza, byaba biteye agahinda kandi binababaje guharanira kuba impumyi. Wabona umugaye kubera impamvu zitandukanye ariko kwimugaza ntibikwiriye kuko ntaho byaba bitaniye no kwiyahura kandi uwiyahuye ntaririrwa.  Kubera ko Gandhi yaharaniraga amahoro, asaba abahindi kutihorera bitwaje ibibazo bya politiki byari mu gihugu cyabo, byatumye mu gihugu haba impinduka nziza hatabayeho kumena amaraso. Ibyo byiza yakoreye igihigu cye nibyo byibukwa uyu munsi bityo agafatwa nk’intwali, urugero rwiza. Umuntu akaba yabaza umuyobozi usoma iyi nkuru niba azasiga inkuru ki imusozi!

Nyuma yo gusoma iyi nkuru biraboneka ko ibyaha ari uruhererekerane kubabikora kuko, ibyo ukorera mugenzi wawe, nawe bakazabigukorera, ari nabyo Gandhi yita ubuhumyi kuko niba ukuyemo umuntu ijijo nawe bazaguhora ko warimukuyemo.

Abirinda guhohotera abandi no kubagirira nabi abo umuntu yabagereranya n’abareba kure, baba bifuza ko igihugu gitungana, kibamo ituze n’amahoro. Iki gice cya kabiri akaba aricyo abantu bose bagombye guharanira kubamo mu rwego rwo kwirinda gukora ibyaha bisubiza abaturage mu kutareba aho batuye, na kure y’aho bityo igihugu kikabura amahoro.

 

Iyi nkuru izagira ibice byinshi ndabararikira kuyikurikira kuko kuko izajya itambuka kuri bwiza.com buri wa mbere saa yine.

 

Izindi wakunda

2 Ibitekerezo

Umunyantege nke ntashobora kubabarira, imbabazi n’umwihariko w’abanyembaraga- Gandhi - bwiza.com 07/04/2019 9:46 pm at 9:46 pm

[…] Ku batarasomye inkuru yacu iheruka, reka twongere twibukiranye, wakanda hano ukayisoma […]

Subiza
Kunanirwa kwihangana ni ko gutsindwa intambara- Gandhi - bwiza.com 15/04/2019 9:13 am at 9:13 am

[…] Ijisho riramutse rihorewe irindi, abatuye isi bose bakwisanga ari impumyi- Amwe mu magambo Gandhi ya… […]

Subiza

Tanga Igitekerezo

Bwiza.com
error: Alert: Ntabwo byemewe!!