bwiza.com
Ahabanza » Kwanga ubutegetsi bisobanuye kwanga igihugu? Gukunda ubutegetsi bivuga gukunda igihugu?
Featured Politiki

Kwanga ubutegetsi bisobanuye kwanga igihugu? Gukunda ubutegetsi bivuga gukunda igihugu?

Umusomyi wa bwiza.com, ntaribuze kuvuga amazina ye kubera ibanga ry’umurimo, aherutse kumbaza ibyo bibazo mubona hejuru maze numva arampamije by’ukuri.

Nibajije aho mpera ndacanganyikirwa ariko nihagararaho kigabo ngo ataza kundunguruka kandi basanzwe banyemera.

Yabanje kuntera ubwoba ati ariko Muzehe wowe inkuru zawe zose ziba ari ibibazo gusa? Musubiza bwangu ko no ku ntebe y’ishuli ariko nari meze kuko nakundaga kubaza cyane kugira ngo menye. Rero iyo nibajije ibibazo mba nshishikajwe no kumenya iyo mpawe ibisubizo. Nti kandi mu bunararibonye bw’umwuga wacu n’iyo utansubije mfata ko wemeye igitekerezo cyanjye cyangwa nabyo nkabigira inkuru ko wancecekanye.

Niko gukomeza ambaza gutandukanya gukunda no kwanga ubutegetsi n’isano ryabyo n’igihugu. Nibutse inkuru nigeze kwandika mbikomozaho yavugaga iti: si ndi inyangarwanda ahubwo ndi inkundurwanda yasohotse bitari kera, muri yo nasobanuraga ko bigoye gupima urwo rukundo cyangwa urwango kuko ahanini bishingira ku ugupima!

Mu rwego rwo kutamutindira musubiza nitonze ngira nti: Ni ngombwa kubanza kumenya ubusobanuro bw’ubutegetsi n’igihugu. Ubutegetsi n’ingingo imwe mu bigize igihugu. Bamwe bakunze kwita ubutegetsi ubuyobozi mu rwego rwo kwirinda ko hagaragaramo igisa n’igitugu. Ubutegetsi bugizwe n’abantu batowe cyangwa bapinganwe, bahawe imyanya runaka bashinzwe gutegura gahunda y’igihugu no kuyishyira mu bikorwa hagamijwe kugeza abo bashinzwe ( abaturage) ku ntego biyemeje. Ibi bigakorwa hisunzwe itegeko riruta ayandi yose y’igihugu ariryo Itegekonshinga n’andi mategeko arishamikiyeho. Naho igihugu n’ikintu kigizwe n’ubutaka, ubutegetsi ( maze kuvuga) cyangwa guverinoma, n’abaturage.

Kwanga ubutegetsi bisobanura kwanga igihugu?

Hari abashobora guhita basubiza bati yego ariko bigaterwa n’aho bari n’intebe bicayemo. Ninako abatari bake bakunze kubibona akaba ari nabyo bagenderaho bakuvutsa guhabwa amahirwe ku byiza by’igihugu nko kubona imyanya myiza n’ibindi.

Ariko kwanga ubutegetsi ntibisobanura kwanga igihugu. Ushobora kuba utemeranya nabyo ku ngingo zimwe na zimwe, ku ngengabitekerezo ya politiki ( political ideology) ukaba ufite iyawe ubona ko yaba iboneye kurusha iy’ubutegetsi buriho. Ukaba udashobora kubyumba kimwe n’ubwo butegetsi ariko muhuriye ku gihugu cyanyu cyababyaye. Aha ariko nanone ushobora kwanga ubutegetsi ukagambirira kubugirira nabi uteza umwuka mubi cyangwa intambara bigateza impagarara n’imidugararo mu baturage bikaba byabagiraho ingaruka ku mutekano, ubukungu , imibereho myiza , umuco n’ibindi. Iki gice cyangiriza igihugu ni kibi bigafatwa ko uba utagikunda.

Gukunda ubutegetsi bisobamura gukunda igihugu?

Ushatse wahita usubiza yego ariko ntiwaba wibeshye kuko nyine biba bigaragaza ko uri umuyoboke mwiza. Hari igihe ushobora kugaragara nk’ukunda ubutegetsi kandi hari icyabiguteye, nko kuba cyaragukamiye kikaguha imyanya myiza y’akazi. Wakageramo ugakorera nabi igihugu wiba ibya rubanda, urya ruswa, utonesha, uronda amoko, usambanya abakozi ukuriye, usiba ku kazi n’ibindi bibi nkibyo.

Nubwo bishobora kutitabwaho kubera abaguhaye imbehe nabo muba mudafite aho mutaniye bagakomeza kukureka ukica ugakiza mu byukuri bene uyu muntu ntaba akunda igihugu. Ushobora gukunda ubutegetsi rero kandi udakunda igihugu. Usibye ko kurundi ruhande bishoboka ko wakunda ubutegetsi ukanakunda igihugu ushyira imbere ibifitiye inyungu abaturage.

Nasoza nerekana ko ibi byose ari uruvangitirane rw’ibintu ahanini wabimenya usuzumye uko bikorwa akaba ari ingingo itari ibanga ridakorwaho ahubwo umuntu wese agira uruhare mu kugira icyo arivugaho adapfukiranwe. Iki nicyo bita imiyoborere myiza kuko ari abayobora n’abayoborwa bagira uruhare mu kumenya ibibafitiye umumaro, ibyiza bakabikomeza no kurushaho kubinoza, naho ibibi bakabirwanya. Bikunze neza niho mu bihugu byateye imbere inzego zose zigenzurana zikanasuzumana mubyo bita ( checks and balances).

Si ngombwa rero gupima ikigero abantu bakundamo igihugu cyangwa kutagikunda kuko byose bigaragarira mu kureba aho abaturage bigejeje mu myumvire byose bakabivoma mu burere mboneragihugu. Ibi bikaba inshingano nyamukuru y’ubwo butegetsi navuze hejuru bukundwa cyangwa bukangwa.

Birasaba ariko ko n’abagize ubwo butegetsi bagomba kuba nabo ubwabo bafite ubwo burere kuko aribyo byafasha mu guhindura imyumvire yabo bayobora kugeza kukubakundisha igihugu.

 

Izindi wakunda

1 Igitekerezo

eric 04/04/2019 1:56 pm at 1:56 pm

Ibyo aribyo byose ufite advanced logic mumitekerereze . Najye najyaga mbivanga ariko you are right

Subiza

Tanga Igitekerezo

Bwiza.com
error: Ntibyemewe