bwiza.com
Ahabanza » Ngoma: Abagororwa b’abagore bibasirwa n’ihungabana baterwa no kudasurwa n’imiryango yabo
Amakuru Politiki

Ngoma: Abagororwa b’abagore bibasirwa n’ihungabana baterwa no kudasurwa n’imiryango yabo

Bamwe mu bagore bafungiye muri gereza ya Ngoma iherereye mu karere ka Ngoma, Intara y’Uburasirazuba, bavuga ko bahura n’ikibazo cy’ihungabana bitewe no kudasurwa n’imiryango yabo.

Ubuyobozi bwa gereza butangaza ko abagore 15% aribo bagerwaho n’imiryango yabo, abandi bakaba basa n’abo yahaye akato bitewe n’ibyaha bafungiye. Gusa ngo bibagiraho ingaruka cyane ku buzima bwabo.

Uyu aragira ati “Nka cyane, ku munsi wo gusurwa, usanga bigunze cyane, bigaragara ko biyanze, mbese ukabona intege zacitse batiyumva neza. Birabagora cyane kuko usanga buri wese abyuka ateze amaso, n’udateganya gusurwa aba yayateze, mu by’ukuri avuga ati ‘wenda nanjye Imana yamfasha”.

Undi ati “Dushobora kubifashwamo n’abafatanyabikorwa cyangwa se namwe mukadukorera ubuvugizi kugira ngo imiryango yacu itugereho kuko bitugiraho ingaruka kuko dushobora guhura n’ihungabana, bamwe na bamwe muri twese, ariko uretse ko tubifashwamo n’ubuyobozi bwa gereza kugira ngo iryo hungabana ritagira uburemere”.

Komisera muri Komisiyo y’Uburenganzira bwa Muntu, Kawera Marie Sylvie, avuga ko ubushakashatsi iyi Komisiyo yakoze bwagaragaje ko abagore muri za gereza bahura n’ihungabana kubera ko bakoze ibyaha.

Ati “Ugasanga rero bibatera ihungabana, ariko wajya kuri gereza y’abagabo ku munsi wo gusura ugasanga abagabo basuwe cyane, muri rusange benshi batubwiye ko batereranwe n’imiryango. Kumva ko wakoze icyaha ntabwo umuryango ubifata nk’umugabo, ikindi ni uko usanga abagabo babo barashatse abandi bagore”.

Komiseri Mukuru Wungirije wa RCS, Charles Musitu yavuze ko ari ikibazo cyo guhagurukirwa, ati “Ubundi umuntu uwo ariwe wese n’ubwo yaba arwaye, n’ubwo yaba arwaye indwara mbi, uramusura ndetse yanapfa ukamuhamba, nibyo dushaka gukora. Hari ababishinzwe tuzashaka ababyeyi babo cyangwa abagabo babo tubakangurire baze babasure”.

Nk’uko FlashTv  ibitangaza, ngo iyi gereza ya Ngoma irimo abagororwa basaga 1000 ariko imibare itangazwa n’ubuyobozi bw’iyi gereza, ngo abasurwa ni 15% gusa.

 

 

Izindi wakunda

Bwiza.com