bwiza.com
Ahabanza » Rusizi: Ubuke bw’amarerero buracyari imbogamizi mu burezi bw’abana bato
Amakuru Mu mashuli

Rusizi: Ubuke bw’amarerero buracyari imbogamizi mu burezi bw’abana bato

Ubuyobozi bw’akarere ka Rusizi buvuga ko bugifite ikibazo gikomeye cyane cy’amarerero y’abana bato, aho kugeza ubu ngo ari 132 gusa mu midugudu 596 ikagize kandi buri mudugudu wagombye kurigira, bikaba bikibangamiye uburezi bw’abana bari munsi y’imyaka 5 y’amavuko.

Ni bimwe mu byo umuyobozi w’akarere ka Rusizi wungirije ushinzwe imibereho myiza y’abaturage, Nsigaye Emmanuel  yavuze ubwo yifatanyaga n’uruganda rw’icyayi rwa Shagasha rukorera muri aka karere, gutaha irerero rya Nyarushishi rwujurije abaturage b’umurenge wa Nkungu,ryakira abana bo mu mirenge ya Nkungu,Mururu,Giheke na Kamembe baryegereye.

Visi Meya, Nsigaye Emmanuel yifatanya n’abandi bayobozi gufungura ku mugaragaro iri rerero

Iri rerero nk’uko bamwe mu baharerera babitangarije bwiza.com, ngo rije ari igisubizo gikomeye cyane ku babyeyi n’abana b’iyi mirenge kuko ngo aba babyeyi  bavuga ko bari basanzwe bazinduka bajya gushakisha ikibatungira imiryango, bagira ibibazo byo kugira aho basiga aba bana bato.

Bakomeza bavuga ko kuba abana babo babona aho birirwa bitabwaho mu gihe bo bagiye mu mirimo bava mo bwije cyane,abana bagahabwa igikoma cyuje intungamubiri,bagakina n’abandi ntibigunge,bakitabwaho mu isuku no mu bindi bigishwa bibakangura mu bwenge,ari igisubizo cyiza babonaga mu bana bo mu mijyi gusa,bakishimira ko n’iwabo bihageze.

Nyiraneza Claudine umwe muri bo, yagize ati’’ Nahoranaga imihangayiko yo kubona aho nasiga umwana wanjye muto kuko bakuru be babaga bagiye kwiga nkabura uko ngira kandi ntari kumwiriranwa mu rugo, ariko aho uru ruganda rutwujurije iri shuri umutima wagiye hamwe, ndamwohoreza nkirirwa mu kazi numva ntuje, abandi bana bataha na we atashye akabona abo bagumana kandi n’ubwenge bwe mbona bugenda bukanguka cyane kuruta mbere acyirirwa mu baturanyi nabuze aho mwerekeza  ngo njye mu mirimo yanjye.’’

Umuyobozi  mukuru w’uru ruganda, Eleanor Mwai  avuga ko uretse iri rerero, rumaze gukorera n’ibindi byiinshi abaruturiye, cyane cyane abo mu mirenge ya Nkungu na Giheke,nko kuba rumaze kubageza ho amazi meza, inka 52 rumaze guha bamwe muri bo muri gahunda ya girinka, gufasha mu mitunganyirize y’urwibutso rwa Jenoside yakorewe abatutsi rwa Nyarushishi n’ibindi,akumva ari inshingano z’uruganda guturana n’abaturage bataganya kandi rubegereye.

Ati “Iri rerero ryuzuye ritwaye amafaranga agera kuri 7.500.000 y’amanyarwanda kandi tugiye kuzuza n’irindi mu murenge wa Giheke risanga n’ibindi byinshi tugenda dukorera abaturage mu rwego rwo gufatanya urugamba rw’iterambere kandi tuzakomeza kubaba hafi no kubabera inshuti nziza.’’

Ku bibazo bihari nko kuba abarezi  basa n’abadahembwa kubera ko amafaranga 2.000 bya buri kwezi yakwa ababyeyi ngo havemo ay’agahimbazamusyi k’aba barezi, abenshi mu babyeyi bavuga ko batayabona bigatuma n’abana bagana iri rerero bakiri bake, imfashanyigisho zikiri nke, n’ibindi, umuyobozi w’aka karere wungirije ushinzwe imibereho myiza y’abaturage,Nsigaye Emmanuel avuga ko  biri hose mu mashuri nk’aya ariko bakomeza kubishakira ibisubizo ku bufatanye na MINEDUC.

Avuga ko bagihanganye n’ubuke bw’amarerero kuko hamaze kuboneka 132 gusa kandi hakenewe nibura 596 angana n’umubare w’imidugudu akagize ngo nibura muri buri mudugudu haboneke irerero,agasaba abaturage kwishaka mo ibisubizo by’ibi bibazo Leta ikaza ibunganira.

Iri rerero ngo ni igisubizo ku babyeyi baburaga aho biriza abana babo
Umwana woherejwe mu irerero kare ngo bimufasha gukura mu bitekerezo

Izindi wakunda

Bwiza.com
error: Alert: Ntabwo byemewe!!