bwiza.com
Amakuru Politiki

Abarwanashyaka ba FDU-Inkingi bagejejwe mu rukiko bambaye amapingu ku maboko n’amaguru

Ku munsi wa Mbere w’iburana mu mizi ry’abarwanashyaka b’ishyaka FDU-Inkingi ritari ryemerwa mu Rwanda, bagaragaye mu rukiko bambaye amapingu ku maboko n’amaguru.

Mu cyumba cy’urukiko bari mu mpuzankano y’iroza iranga abagororwa, bari bambitswe amapingu ku maboko n’iminyururu ku maguru, uburyo butari busanzwe mu Rwanda.

Abagabo bagejejwe mu rukiko, buri umwe yambitswe amapingu n’iminyururu ku maguru, ubwo urubanza rwaburaga akanya gato ngo rutangire ngo byatangaje benshi mu rukiko. Ubwo bajyaga mu mwiherero ngo bakururaga amapingu ku makaro y’urukiko, abari mu rukiko barimo n’abavandimwe babo bagaragaje ukumirwa, bamwe bimyoza, abandi bifata mapfubyi, abandi bazunguza imitwe.

Ku munsi wa mbere w’iri buranisha mu mizi, ubushinjacyahwa bwahariwe ijambo busobanura ibyaha bubarega. Ni ibyaha by’ubwinjiracyaha mu kurema umutwe w’ingabo utemewe, gushaka guhirika ubutegetsi bw’u Rwanda bakoresheje inzira y’intambara no gukorana n’imitwe y’iterabwoba irwanya Leta y’u Rwanda.

Ubushinjacyaha busobanura ko abashinjwa bashatse kubinyuza mu ihuriro ry’amashyaka atanu arimo FDU-Inkingi, RNC, FDLR n’ayandi mu cyiswe ihuriro P5. Ubushinjacyaha butangaza ko bashakaga gushakira abayoboke bagamije kurema igisirikare cya P5 muri Kivu y’Amajyepfo mu duce twa Fizi na Uvira.

Burega bamwe gushakira bagenzi babo ibyangombwa by’inzira n’amafaranga bajya muri Kivu y’Amajyepfo. Ubushinjacyaha bukavuga ko hari babiri bafatiwe ku mupaka w’u Rwanda na Repubulika Iharanira Demokarasi ya Congo i Rusizi, bagerageza kwambuka ngo bajye gutozwa igisirikare, bukanarondora bamwe buvuga ko barangije kugera muri Congo.

VOA yakurikiranye iby’iri burana, ivuga ko ubushinjacyaha bwemeza ko byinshi mu bimenyetso bushingiraho, birimo ibiganiro buvuga ko bwumvirije ku matelefoni yabo ngendanwa bavugana na bamwe barangije kugera mu ihuriro P5.

Hari n’amwe mu mazina ubushinjacyaha buvuga, ko mbere yo kwinjira mu ihuriro P5 babanje kujya gusura Perezida w’ishyaka, Ingabire Victoire, akiri muri gereza ngo bamubwire ibyo bagiyemo.

Umwe mu baregwa, witwa Nsabiyaremye, ashinjwa ko mu biganiro yagiranye na bagenzi be, yaba yaravuze ko ntacyo bashoboraga kugeraho Leta y’u Rwanda ikiyobowe n’agatsiko umushinjacyaha yavuze ko bitaga ak’amabandi. Umushinjacyaha avuga ko abashinjwa bashakaga gusubiza u Rwanda mu kaga.

Mu baregwa harimo Twagirayezu Fabien wemera ko yari ashinzwe ubukangurambaga ku rwego rw’igihugu muri FDU-Inkingi, ubushinjacyaha bumushinja kubwira abo bari kumwe ko hari igisirikare kirimo gutegurwa hanze y’u Rwanda abakangurira kukijyamo.

Abaregwa uko ari 11 haburamo uwari Visi Perezida wa mbere w’iri shyaka, Twagirimana Boniface, bitazwi irengero rye, mu gihe Gasengayire Leonille ngo yari umubitsi w’ishyaka ari na we ngo wanatangaga amafaranga y’itike ku bashakaga kujya mu ihuriro P5.

Umucamanza mu rukiko i Nyanza, yabajije abaregwa niba biteguye kwisobanura cyangwa ko bazisobanura mu iburanisha ritaha, umwe yafashe ijambo mu izina rya bagenzi be, Nsabiyaremye Gratien, umucungagereza abanje kumuzitura amapingu n’iminyururu ku maguru, yatambutse avuga ko baburana ibindi bikazasuzuma nyuma.

Avuga ko urubanza rwabo rumaze igihe kirekire ndetse ko gereza bafungiyemo itaborohereza guhura n’ubunganira mu by’amategeko, Me Gatera Gashabana.

Urukiko rwemeje ko rugiye kwiha igihe urubanza rukazaba rwarapfundikiwe mu mpera z’uku kwezi kwa Kane. N’ubwo bataragerwaho ngo biregure, mu maburanisha yose yabanje bahakana ibyaha bashinja.

Inkuru bifitanye isano: Kanda hano uyisome

Aba bashinjwa batangiye gutabwa muri yombi muri Nzeri 2017, iburana ritaha riri ku wa 11 Mata 2019.

Izindi wakunda

Bwiza.com