bwiza.com
Ahabanza » Amerika yashyize igitutu kuri Leta y’u Burundi yahagaritse BBC na VOA
Amakuru Politiki

Amerika yashyize igitutu kuri Leta y’u Burundi yahagaritse BBC na VOA

Minisiteri y’Ububanyi n’Amahanga n’Ubutwererane ya Leta Zunze Ubumwe za Amerika, yasabye Leta y’u Burundi kwisubiraho ku ngingo yafashe yo guhagarika radiyo Ijwi rya Amerika (VOA) ndetse na BBC.

Iyi Minisiteri y’Ububanyi n’Amahanga ya Amerika irasaba kandi Leta y’u Burundi kurekera abanyamakuru uburenganzira bwabo, bagakomeza gutara amakuru agatambutswa nk’uko byari bisanzwe kuri izi radiyo mpuzamahanga, bakishyira bakizana mu mwuga wabo muri iki gihe hitegurwa amatora y’umukuru w’igihugu mu 2020.

Umuvugizi w’iyi Minisiteri, Robert Palladino, yatangarije itangazamakuru ko iyi ngingo ya Leta y’u Burundi, iteye amakenga cyane ndetse ko bihabanye n’ingingo ya 31 yo mu itegeko Nshinga ry’u Burundi ijyanye no gutanga ibitekerezo . Leta ya Amerika ikaba isaba  Leta ya Nkurunziza kwisubiraho kuri iyi ngingo yita igayitse.

Ubu busabe Amerika ibuhurijeho n’umuryango CPJ uharanira Uburenganzira bw’abanyamakuru ku Isi, usaba u Burundi kurekera uburenganzira ibi bitangazamakuru ndetse n’abanyamakuru, ko kubazitira gutara no gutangaza ibibera kuri ubu butaka ari ukubuza abaturage uburenganzira bwabo bwo kumenya ibibera ku butaka bwabo byaba ibyiza cyangwa ibibi.

VOA itangaza ko n’Ishyirahamwe Olucome rishinzwe kurwanya ruswa ndetse n’isesagurwa ry’amafaranga y’igihugu naryo rinenga Leta y’u Burundi ku bw’iyi ngingo yo guhagarika BBC na VOA.

Mu itangazo Olucome yashyize hanze, iributsa ko BBC na VOA bifunzwe mu gihe na radiyo RPA, radiyo Bonesha, na radiyo-televiziyo Renaissance zasenywe kuva mu mwaka wa 2015, igasanga uku kuzitira abaturage kumenya ibibera iwabo ari inzitizi ikomeye mu kurwanya ruswa ndetse n’inyerezwa ry’ umutungo w’igihugu, igasaba ko Leta yaganira na ba nyiri ibitangazamakuru, bakagira ibyo bemeranywaho ariko abaturage bagahabwa amakuru.

Izindi wakunda

Bwiza.com
error: Alert: Ntabwo byemewe!!