bwiza.com
Amakuru Mu mashuli

Ubushomeri na bamwe mu bakoresha, bimwe mu bidingiza kwishyura inguzanyo ya buruse

Kuva mu mwaka wa 1980 nibwo Leta y’u Rwanda yatangiye gutanga amafaranga ya Buruse ku banyeshuri biga muri Kaminuza, aho ishyiriyeho gahunda yo kuyishyuza, bamwe bavuga ko batarabona ubushobozi ngo babashe kuyishyura mu gihe batari babona akazi, na bamwe mu bafite akazi, abakoresha babo bakaba babahishira.

Bamwe mu baturage bavuga ko byaba byiza abahawe aya mafaranga bayishyuye ngo kuko byafasha abakiri bato, nabo akazabafasha umunsi baba bageze muri kaminuza. Uyu muturage agira ati “Uwayahawe ayo mafaranga yakagombye kumva ko ari ideni yahawe nk’uko banki yamuguriza, yazabona ubushobozi akaryishyura, ayo mafaranga akagirira n’abandi akamaro”.

Undi na we ati “Iyo bayishyuye bituma na barumuna babo yazabagirira akamaro, nabo bakazabona amafaranga abafasha, bakiga nk’uko n’abandi baba barize kandi bikazatuma abo bato bazageza igihe bagateza igihugu imbere nk’uko na bakuru babo baba bararangije bakagiteza imbere”.

Ku rundi ruhande, hari abavuga ko nta wanze kwishyura, ahubwo ko hari igihe umuntu arangiza kwiga kaminuza yagera hanze akabura akazi. Ati “Kuyishyura byafasha abana bamukomokaho na barumuna be, ahubwo aho byaba ikibazo wenda ni aho wa muntu bamukurikirana nta kazi afite, ariko igihe yabonye akazi akajya yishyura make make ariko akagaruka agafasha abandi ntacyo byaba bitwaye”.

Umuyobozi w’ishami rishinzwe gutanga inguzanyo ku banyeshuri no kwishyuza abazihawe muri Banki y’u Rwanda itsura Amajyambere (BRD), Murangwayisa Emmanuel avuga ko hari intambwe yatewe, ariko ko hakiri imbogamizi y’abakoresha batamenyekanisha abakozi bahawe iyi nguzanyo.

Aganira na RBA dukesha iyi nkuru, yagize ati “N’umukoresha afite inshingano y’uko agomba kumenyakanisha abakozi barangije bize ku nguzanyo ya Leta, imbogamizi duhura nazo ni uko abakoresha bamwe batabikora, ariko tugashimira abakoresha bamwe na bamwe babikora”.

Mu 1980 nibwo aya mafaranga yatangiye guhabwa abanyeshuri ba kaminuza ari mu byiciro bitatu, ay’ishuri, atunga abanyeshuri ndetse n’ay’urugendo mu bajya kwiga mu mahanga. Kuva muri uwo mwaka kugera mu 2016 hari hamaze gutangwa Miliyari zisaga 70, kuva mu 2016 kugeza uyu mwaka hamaze gutangwa andi asaga Miliyari 100. Umukozi ufite akazi wahawe iyi nguzanyo akaba aba agomba gukatwa 8% ku mushahara ahabwa buri kwezi yo kwishyura iyi nguzanyo.

Izindi wakunda

Bwiza.com