bwiza.com
Ahabanza » Isezerano ry’Imana ntiribura gusohora kubera uko uteye
Ijambo ry'Imana

Isezerano ry’Imana ntiribura gusohora kubera uko uteye

Zakariya abaza marayika ati ” ibyo nzabibwirwa n’iki, ko ndi umusaza n’umugore wanjye akaba ari umukecuru?”

Aya magambo aboneka mu gitabu cy’inkuru nziza nkuko cyanditswe na Luka 1:18, aho Zakariya yagaragarizaga marayika w’Imana ugushidikanya gukomeye ubwo yari amaze kumugezaho isezerano ry’uko azabyara Yohani.

Uko gushidikanya kwa Zakariya kwarimo kwizera guke kandi wasuzuma neza ukaba wabona ko yari afite ukuri. Nawe se, umusaza rukukuri n’umukecuru we Elizabeti wari ingumba, wakwibaza ko byari byoroshye kwakira iyo nkuru y’uko bazabona umwana?

Gushidikanya kwa Zakariya kwari gufite ishingiro kuko nubwo bari abakiranutsi nk’uko bibliya ibivuga, ariko bari bambaye umubiri. Gushidikanya nko gushaka kugira ngo marayika abemeze ko bazabyara. Niho, abwira marayika ati “ nzabibwirwa n iki?” Zakariya birashoboka ko yatsindagiraga ikibazo cye ashaka ko marayika amuha ikimenyetso cy’uko azabyara, ku ruhande rumwe kuko yakiranukiraga Imana yari yizeye ibyo marayika yaramaze kumugezaho nk’isezerano.

Natwe mu buzima bwacu bwa buri munsi dukunze gushidikanya ku masezerano Imana yaduhaye. Ukisanga urimo kuvuga uti ese koko mu bibazo mfite, uko ndiho, mu burwayi bwanjye, mu bukene bwanjye, mu busaza bwanjye, mu bukecuru bwanjye, mu bwenge bwanjye, Imana yashobora kunyibuka?

Umva, Imana ntiyivuguruza, amasezerano yayo ntahinduka, ibyo yagusezeranije no kubikora izabikora ititaye ku bibazo urimo, ibihe urimo, n’imiterere yawe.

Burya twicwa no kubura kwizera! Iyo Zakariya agira kwizera guhagije ntabwo yari kubaza marayika ikibazo nka kiriya. Tubaza Imana ibibazo byinshi, akenshi twititomba tuti, ese Mana koko ibyo wansezeraniye bizasohora?

Hari impamvu ebyiri cyangwa eshatu zishobora kuba zitera abakristu badahinduka bagahora bameze nk’ibikuri mu buryo bw’Umwuka, badakura. Bityo kwizera nako kukagabanuka cyangwa kukabura.

1) Kutumva inyigisho uhora ubwirwa, zigasa nkaho zinjiye mu gutwi kumwe zigasohokera mu kundi. Ijambo rikamera nka ya mbuto yabibwe ku rutare;

2) Kubwira inyigisho nziza ziryoheye amatwi yacu, inyigisho zidacyaha, wagereranya n’umuganga uvura igikomere atinya kukibabaza no kugikomeretsa. Icyo gikomere ntigishobora gukira nubwo kiba cyahuye na muganga. Izi nyigisho zamera nka ya mbuto yabibwe ku butaka ikazongwa n’amahwa igapfa.

3) Kwemera kuvurwa no gukomereka, umwizera agakomeretswa n’ijambo kugira ngo abashe gukira. Uyu wakira izi nyigisho arahinduka by’ukuri akagereranywa na ya mbuto yabibwe ku butaka bwiza. Imana yacu muri kamere yayo irangwa n’urukundo n’imbabazi. Irakunda, igacyaha ndetse ikanahana!

Iyo wemera ayo mahaye na kamere byayo, bitera umuntu kwizera kandi kwizera nibyo bimurinda kurimbuka ahubwo agahabwa ubugingo buhoraho. Twizere amasezerano y’Imana nibwo azabasha kutugeraho mu gihe gikwiriye, kandi kwizera niko kuzatuma tubona Imana.

 

Izindi wakunda

Bwiza.com
error: Alert: Ntabwo byemewe!!