bwiza.com
Ubukungu

U Rwanda rwaje mu bihugu 10 byambere ku isi byateje ubukerarugendo imbere muri 2019

 

U Rwanda rwaje ku mwanya wa gatandatu(6) ku isi mu guteza imbere urwego rw’ubukerarugendo mu buryo bwihuse muri 2019.

Nk’uko tubikesha raporo y’ikigo gishinzwe ibijyanye n’ingendo n’ubukerarugendo ku isi cyitwa World Travel and Tourism Council , igihugu cya Ethiopia nicyo kiyoboye ibindi ku isi mu guteza ubukerarugendo imbere muri 2019 naho Uganda iza ku mwanya wa 12.

Mu Rwanda, urwego rw’ubukerarugendo rwazamutse ku kigero cya 13.8%. Mu gihe Ethiopia yazamuye urwego rw’ubukerarugendo ku kigero cya 48.6% bituma uru rwego ruha akazi abarenga miliyoni ebyeri(2.2). Uganda yazamuye ubukerarugendo ku kigero cya 11.3% naho Kenya ibuzamura ku kigero cya 5.6%.

Ubu bushakashatsi bukorwa buri mwaka, bwagaragaje ko ubukerarugendo bugira uruhare runini mu kuzamura ubukungu bw’igihugu. Mu bihugu 185 n’uduce 25 ku isi, abashakashatsi bagaragaje ko uru rwego rubumbatiye 10.4 % ku musaruro mbumbe w’ibihugu ku isi.

Urwego rw’ubukerarugendo rukaba rwaratanze imirimo miliyoni 319 ku isi. Bityo bikaba bigize 10.% by’imirimo yahanzwe muri 2018. Iyi raporo ikaba igaragaza ko uru rwego ruzakomeza kuzamuka .

Iyi raporo igaragaza ko mu mirimo itanu yahanzwe haba harimo umwe ujyanye n’ubukerarugendo mu myaka itanu ishize. Ibi bikaba byerekana uburyo uru rwego rugira uruhare runini mu iterambere ry’ubukungu.

Nkurunziza Viateur @Bwiza.com

Izindi wakunda

Bwiza.com
error: Alert: Ntabwo byemewe!!