bwiza.com
Ahabanza » Hon. Sebaba mu muhango wo #kwibuka25 ati : “U Rwanda rwavuye ahabi “
Featured IBITEKEREZO Kwibuka

Hon. Sebaba mu muhango wo #kwibuka25 ati : “U Rwanda rwavuye ahabi “

Uko umwaka uje undi ugataha, guhera mu 1994, mu bihe nk’ibi, sinoroherwa kuko no gufata ibaba bijya binanira atari uko ubwenge budahari, ariko maye buba bwagiye, kubera kwibuka abavandimwe banjye, ababyeyi banjye, inshuti zanjye, abo twakiranye, abo twiganye, abo twakoranye, abo twasangiye akabisi n’agahiye, ubu batakiriho bishwe na bene wacu kandi bazira uko baremwe, kuri ubu nkabona aho igihugu kigeze ngira nti ” U Rwanda rwavuye habi.”

Musanzwe mumenyereye nshweza nkanatebya mu misango ndi kumwe n’abagabo nkanjye, niyemera kuko nziko ntaba njyenyine muhari mwese, mukagerageza kundangaza kugeza ntitekerejeho cyane, nkiyumanganya nkamwenyura ngaseka, ariko ibihe nk’ibi byagera byo kwibuka ngahungabana, nkarira, ngatwarwa n’agahinda, umutima ukandya ukenda kumvamo, ngatinya cyane uwantoneka inguma n’ibikomere bindimo.

Mpora nibaza ibihe byose ariko cyane cyane icyo naba narazize, icyo abanjye bazize, inyungu abampekuye bakuyemo! Ndabyibaza se ngo mbibonere ibisubizo??? Ashwi da! Ikimbabaza muri byo byose ni uko njyewe Hon. Sebaba ntari umututsi, simbe n’umuhutu cyangwa umutwa. Yewe nta n’icumu cyangwa umupanga, ikibando, ubuhiri, agafuni cyangwa ikindi gikoresho nakozeho icyo gihe. Sinigeze mvumbura ngo ntere akabuye aho abandi bari bihishe mu bihuru cyangwa muri yorodani mu nsengero no mu bisenge. Ariko aho nari nihishe narabirebaga.

Iyo ngira ubushobozi nari guhindura ubwoko bwanjye bukaba aribwo bwandikwa mu byangombwa byange maze nkareba unkoraho, maze nkitwa umunyiginya, umunyarwanda. Kubera ko ariko mama yambwiye agihumeka! Rimwe anganiriza ku mateka yacu kuko yari inshuti magara, niwe wambwiye ko ari umuhutukazi naho papa akaba umututsi. Ndamubaza nti none ubwo njye ubavukaho ndi iki? Ati uri TSIHU, umunyiginya. Nti ese ubu bwoko bubaho? Ati yego ariko bukunze kwibagirana.

Ndumirwa kuko nasanze ibi by’amoko ntabivamo kuko ntabyumvaga neza. Jenoside yakorewe abatutsi  muri Mata 1994, ibaye nibwo nagiye numva neza ubugome n’inda nini, ubusambo na politiki mbi y’abahezanguni byatumye bene kanyarwanda barenga miliyoni bamburwa ubuzima bwabo. Ntangazwa cyane ni uko abanyarwanda bishwe na bene wabo, abavandimwe babo mugihe izindi jenoside abantu bishwe n’abanyamahanga.

Igihe kimwe i Rukumbeli, mu muhango wo gushyingura no kwibuka, Umukuru w’Igihugu mu ijambo yahavuye avuga ku bushakashatsi bwakozwe bwerekanye ko impamvu zateye jenoside, yagaragaje ko atemeranya n’abavuga ko yatewe n’abanyamahanga. Ashimangira ibyo, yavuze ko uwo munyamahanga aramutse aboshye ikiziriko ( umurunga w’ihene) wowe ukawinigisha ati ese ikibazo cyaba uwakiboshye cyangwa uwacyinigishije?

Ubundi muri Ntongwe, mu muhango nk’uwo arongera aravuga ati : abantu barishe basubira inyuma bica n’imirambo? Yashakaga kuvuga uburyo imirambo yakorewe agashinyaguro! Iyo ntekereje uwo mwijima w’icuraburindi twanyuzemo, ngasubiza amaso inyuma nkareba aho tuvuye n’aho tugeze n’ukuri nsanga bitanga ikizere ko igihugu cyacu kimaze kwisana ku kigero cyiza. Uwigeze kuyobora iki gihugu umwe niwe wavuze ngo kukiyobora biragoye kandi nibyo koko! Gukumira abarokotse nyuma ya Jenoside ngo hatabaho kwihorera, kubakangurira kubabarira no gutanga imbabazi ( mu gihe zisabwe) ku babiciye, si ibintu byoroshye. No gusaba imbabazi ku cyaha gikomeye cya jenoside nabyo ntibyari byoroshye.

Niyo mpamvu mvuga nti u Rwanda rwavuye kure kuburyo rugeze aho umuntu atabura kwerekana ko hari intambwe nziza yatewe muri urwo rwego. Ubu rero imyaka 25 irashize u Rwanda ruri muri icyo cyerekezo cyunga abanyarwanda. Kuri njye ikibazo si iyo myaka myinshi tudasa nabagiye kubakorera ibirori, umuhango wafatwa nka yubile yo kwibuka gusa. Uyu muhango wo kwibuka twagombye kuwubonamo ibyakozwe biganisha kugusana imitima y’abarokotse no gukomeza kubagaruramo ikizere, ku ruhande rumwe no gutuma ubumwe n’ubwiyunge bigerwako ku gipimo kiri hejuru.

 

Izindi wakunda

Bwiza.com
error: Alert: Ntabwo byemewe!!