bwiza.com
Ahabanza » Nyabihu: Kabera watemewe inka 10 yashumbushijwe indwi
Amakuru mu Rwanda

Nyabihu: Kabera watemewe inka 10 yashumbushijwe indwi

Mu kwezi gushize nibwo abagizi ba nabi bagiye mu ishyamba ahari inka z’uwitwa Ndabarinze Kabera, batemamo 12 ariko 10 muri zo zihita zipfa. Kuri ubu aborozi bo mu Karere ka Rwamagana bakaba bamushumbushije indwi.

Kabera  ni uwo mu karere ka Nyabihu, Intara y’Iburengerazuba, mu ijoro ryo ku Cyumweru tariki ya 24 Werurwe 2019, nibwo inka ze zari mu ishyamba rya Gishwati zatemwe n’ucyekwa kuba uwo bari bashyamiranye, urwego rw’Igihugu rw’Ubugenzacyaha bwerekanye anabyiyemerera.

Kuri uyu wa Mbere tariki ya 8 Mata 2019, nibwo itsinda ry’aborozi riyobowe na Bugabo AbdoulKarim bo mu Karere ka Rwamagana, ryamushumbushije inka zirindwi.

Nk’uko ubuyobozi bw’akarere ka Nyabihu bwabitangaje bubicishije ku rukuta rwako rwa Twitter, bwagize buti “Abatunzi bo mu Karere ka Rwamagana, mu Ntara y’Iburasirazuba bayobowe na Bugabo AbdoulKarim, kuri uyu wa 08/4/2019, baje gushumbusha inka indwi uwitwa Ndabarinze Kabera wo muri Mulinga, kubera inka ze zatemwe mu ijoro ryo ku wa 24/3/2019; bakiriwe na Visi Meya ushinzwe imibereho myiza, Simpenzwe Pascal”.

Urwego rw’Igihugu rw’Ubugenzacyaha (RIB) rweretse itangazamakuru umugabo  ruvuga ko rwataye muri yombi ku wa Gatatu tariki ya 27 Werurwe 2019, ucyekwaho gutema izi nka 12 za Ndabarinze Kabera  wo mu karere ka Nyabihu, 10 muri zo zikaba zarahise zipfa.

Inka 10 zari zatemwe imitsi y’inyuma ku maguru zahise zipfa

Ku wa 28 Werurwe, nibwo RIB yerekanye uwo mugabo w’imyaka 39 y’amavuko, akaba ari impunzi y’Umunye Congo, iba mu nkambi ya Kiziba mu karere ka Karongi. Yemeye ko ariwe watemye izo nka yihimura kuri Kabera.

Yavuze ko yatemye izi nka abitewe n’umujinya w’uko yagabiye Kabera, amwishyuje inyiturano aramukubita ngo binamusigira ubumuga, ndetse ko byanamuteye ubukene. Ati “Navugaga ngo yarankenesheje nanjye mfata umwanzuro utari mwiza”.

Uwazitemye yavuze ko yabanje kunywa Waragi nyinshi: KANDA HANO USOME INKURU  

Ndabarinze Kabera n’umugore we Uwimana Zipora bashumbushijwe, bashimiye aborozi ba Rwamagana babashumbushije
Itsinda ry’aborozi ryashumbushije Kabera inka zirindwi
Iri tsinda ryari riyobowe n’uwitwa Bugabo AbdoulKarim

Izindi wakunda

Bwiza.com
error: Alert: Ntabwo byemewe!!