bwiza.com
Ahabanza » France: Uko Alain Ngirinshuti wayoboye Ibuka yimwe ubwenegihugu ashinjwa kuba intasi y’u Rwanda
Amakuru Featured Politiki

France: Uko Alain Ngirinshuti wayoboye Ibuka yimwe ubwenegihugu ashinjwa kuba intasi y’u Rwanda

Alain Ngirinshuti wigeze kuba Umunyamabanga Mukuru wa Ibuka mu Burayi, yafatiranye igikorwa cyo kwibuka Jenoside yakorewe Abatutsi I Paris mu Bufaransa ku itariki 07 Mata, ashyira ku karubanda akarengane yakorewe n’ubutegetsi bw’u Bufaransa bumwima ubwenegihugu kuko ngo butizeye ko yagandukira igihugu n’inzego zacyo bitewe n’uko abarizwa muri Ibuka.

Ku Cyumweru itariki 07 Mata mu ‘Busitani bw’Urwibutso’ buherereye mu majyepfo ya Paris, Ishyirahamwe ry’abarokotse Jenoside yakorewe Abatutsi, IBUKA, ryateguye igikorwa cyo kwibuka ku bufatanye n’Umujyi wa Paris.

Mu gihe I Kigali Perezida Emmanuel Macron yari ahagarariwe na Depite Hervé Berville, mu Bufaransa yari yagennye minisitiri w’ubucuruzi n’imari, Bruno Le Maire ngo amuhagararire muri iki gikorwa cyo Jenoside yakorewe Abatutsi mu Rwanda mu 1994. Iminsi ibiri mbere yahoo, Perezida w’u Bufaransa akaba yari yakiriye abahagarariye Ibuka mu ngoro ye.

Ubwo yahuraga n’izi ntumwa za IBUKA ku itariki 05 Mata, ni nabwo Perezida Emmanuel Macron yatangaje ishingwa rya komisiyo igizwe n’impuguke mu mateka n’abashakashatsi igomba gucukumbura mu nyandiko z’ibanga zibitse ku bikorwa by’u Bufaransa mu Rwanda kuva mu 1990 kugeza mu 1994.

Alain Ngirinshuti wabaye Umunyamabanga Mukuru wa Ibuka, ishami ry’u Burayi kugeza mu 2018, akaba yarabaye visi perezida wa Ibuka France kuva mu 2007 kugeza mu 2017 ndetse akaba ari uwarokotse uba mu Bufaransa kuva mu 2001, yaboneyeho kuri uwo munsi wo kwibuka guhishura ukuntu yimwe ubwenegihugu bw’u Bufaransa mu 2017.

Mu ijambo yavugiyeho ryuzuye amarangamutima agaruka ku minsi ya mbere ya jenoside asobanura amashusho y’ubwicanyi yabonye igihe yari afite imyaka 15 gusa nk’uko iiyi nkuru dukesha Jeune Afrique ivuga, Alain Ngirinshuti kuri ubu ufite imyaka 40 y’amavuko, yagarutse ku nzira yo gushaka ubwenegihugu bw’u Bufaransa yatangiye mu 2014 ariko itaragize aho igera ku mpamvu z’uko abayobozi b’u Bufaransa ngo batizeye ko azagandukira igihugu n’inzego zacyo.

Ku itariki 14 Nzeri 2017, aezi ane nyuma y’itorwa rya Perezida Emmanuel Macron, ubusabe bwe bwanzwe bwa mbere ku mpamvu zidasobanutse yahawe na la préfecture de police de Paris (ishami rya minisiteri y’ubutegetsi bw’igihugu ritanga serivisi z’ubutegetsi zitandukanye).

Avuga ko bamubwiye ko hagendewe ku bigize dosiye ye n’uburyo yakuzemo, hatizewe ko azagandukira igihugu n’inzego zacyo nk’uko igisubizo yahawe Jeune Afrique yabashije kubonaho kivuga.

Nyuma yo kutumva neza impamvu yo kutemererwa ubwenegihugu, ngo yandikiye minisiteri y’ubutegetsi bw’igihugu, ariko ku itariki 20 Nzeri 2018 noneho ahabwa igisubizo ntakuka kimuhakanira.

Kuri iyi nshuro noneho yasobanuriwe ko nyuma yo kongera gusuzuma dosiye ye, basanze yaragize inshingano zitandukanye mu ishyirahamwe Ibuka, haba mu Bufaransa no mu Burayi, kubw’umwihariko akaba yarabaye visi perezida wa IBUKA-France, kandi ngo yarakoranaga n’inzego z’ubutasi z’u Rwanda. Ibi akaba yarabibwiwe na Jean-Luc Guillemoto, Umuyobozi Wungirije ushinzwe ibijyanye no kubona ubwenegihugu bw’u Bufaransa muri minisiteri y’ubutegetsi bw’igihugu.

Igisubizo yahawe kandi kigaruka ku kiganiro Alain Ngirinshuti yigeze kugirana na serivisi z’Ubuyobozi Bukuru bushinzwe Umutekano w’Imbere (DGSI) nyuma yo gusaba ubwenegihugu.

Icyo gihe, nk’uko yabibwiwe na Guillemoto mu gisubizo yamuhaye, ngo Ngirinshuti yemeje ashikamye ko Leta y’u Bufaransa yagize uruhare muri Jenoside yakorewe Abatutsi mu 1994 kandi igomba guha impozamarira abarokotse.

Kubw’ibi, ngo kuba atagaragaza kugandukira u Bufaransa n’inzego zabwo, basanga nta mpamvu yo kumuha icyo bise amahirwe yo kuba Umufaransa.

 

Izindi wakunda

2 Ibitekerezo

Umurungi Alice 13/04/2019 8:22 pm at 8:22 pm

Bwana Alain! Iyo batanga ubwenegihugu bareba icyakujyanye muri icyo gihugu. Nturi impunzi yuko ubutegetsi bw’i Kigali ntacyo bugutwaye kandi nibyo urabusingiza. Waba se uri umushoramari? Ibyo wagombye kwerekanako ufite agatubutse. Gusa Ubufaransa bushobora no kugutumira bagukeneye bakabiguhera ubwenegihugu. Izo mpamvu zose se hari iyo batarebye neza? Ubuzwa n’iki kujya mu iterambere? Ibuka ni nyarwanda.

Subiza
Abasha 14/04/2019 8:22 pm at 8:22 pm

Watashye ukava muri France Ko iwacu ari amahoro masa

Subiza

Tanga Igitekerezo

Bwiza.com
error: Alert: Ntabwo byemewe!!