bwiza.com
Amakuru Politiki

Abishwe ntibataye agaciro ahubwo abagataye ni ababishe – Guverineri Munyantwali

Ku cyicaro cy’Intara y’Iburengerazuba habereye umuhango wo kwibuka abari abakozi ba Perefegitura, Superefegitura na Komini byahurijwe mu Ntara y’Iburengerazuba bazize Jenoside yakorewe Abatutsi.

Mu ijambo yagejeje ku bari bitabiriye uwo muhango, Guverineri w’Intara y’Iburengerazuba, Munyantwali Alphonse yihanganishije abarokotse Jenoside yakorewe Abatutsi asaba abantu bose guharanira ko itazongera kubaho ukundi.

Yashimiye kandi abahagaritse Jenoside ati:”Kuba twaragize Inkotanyi zikarokora abaturage zigahagarika Jenoside ni umwanya wo kuzishimira no gushima umurongo mwiza abayobozi b’Igihugu cyacu batanga batuganisha aheza.”

Umuyobozi w’Intara kandi yagaragaje ko abishwe batataye agaciro n’ubu bakigafite ahubwo abagataye ari ababishe. Guverineri Munyantwali yagaye abasize bakoze Jenoside bagahunga Igihugu, abo ariko ngo Leta igenda ibigisha bakava ibuzimu bakajya ibuntu uretse ko hakiri bake bakirushya iminsi. Yasabye abantu bose kurinda ibimaze kugerwaho ku buryo nta wabikoma mu nkokora ngo agarure Jenoside cyangwa ashyire u Rwanda ahandi habi.

Mu kiganiro cyatanzwe na Senateri Sindikubwabo Jean Nepomuscène, yavuze ko umukoloni yasenye ubumwe bw’Igihugu maze atanga icyo yise ubwigenge ku Gihugu. Imiyoborere yakurikiye ubwo bwigenge yimitse ivangura mu baturage bityo bamwe bahezwa mu kazi, amashuri, indunduro yabyo iba Jenoside yakorewe abatutsi mu 1994.

U Rwanda ariko ngo ntirwabyaye abayobozi babi gusa nk’uko Senateri abivuga ahubwo rwabyaye n’intwari ariho FPR yaje igahagarika Jenoside. Mu bikorwa iyi ntumwa ya rubanda yahamagariye abantu kurwanya ni ingengabitekerezo ya Jenoside kuko ngo hari aho ikigaragara n’ubwo igenda igabanuka.

Bwana Twagirumukiza Antoine wari umukozi mu yahoze ari Perefegitura ya Cyangugu kuva mu 1992-1994, yagaragaje ihohoterwa we na bagenzi be b’Abatutsi bagiye bakorerwa muri icyo gihe aho igihe cyageze abayobozi bari bakuriwe na Perefe Bagambiki Emmanuel baciyemo ibice abakozi haba igice cy’Abahutu n’Abatutsi.

Ngo byaje kugera n’aho abo batutsi batahabwaga akazi bakitwa ingwizamurongo. Muri Jenoside abakozi ngo nibo bagize uruhare mu kuranga bagenzi babo no gukora amalisiti kugira ngo bicwe. Abantu bari bahungiye kuri Stade Kamarampaka ngo barahabavanaga bakabajyana ahitwa Gatandara kubica. N’ubwo ariko abo bicanyi barimbuye benshi Twagirumukiza avuga ko hari amashami yashibutse; “Imana ntiyemeye ko umugambi w’umwanzi ugerwaho kuburyo ubu dufite icyizere cyo kubaho”.

Uwari uhagarariye Ibuka, Bwana Niyonsenga Jean d’Amour we avuga ko Intara y’Iburengerazuba ifite umwihariko muri Jenoside kuko inkoramaraso nyinshi ariho zivuka. N’igihe abantu bahungaga ngo abo bicanyi niho banyuze bajya muri Kongo.

Yashimiye ubuyobozi bw’Intara n’Uturere ku buryo bagenda bita ku nzibutso z’Abazize Jenoside yakorewe abatutsi aho zimwe zisanwa izindi zubakwa bundi bushya.  Mu byifuzo atanga harimo ko Uturere twakwandika amateka y’ibyabereye mu Karere kuko abatanga amakuru bagenda basaza ndetse n’ikibazo cy’imitungo yagijwe muri Jenoside itishyurwa.

Ku kibazo cyo kwandika amateka ya Jenoside, Guverineri Munyantwali avuga ko Uturere twabitangiye ku buryo hari abatangiye gutanga isoko ku bahanga bazayandika. Naho ku bijyanye n’imitungo yangijwe itarishyurwa, umuyobozi w’Intara yasabye Uturere guhuza imibare n’amakuru ku bagomba kwishyura n’ubushobozi bafite kugira ngo abafite imitungo bishyure.

Uyu muhango wari witabiriwe n’Abasenateri, Abadepite bakomoka mu Ntara y’Iburengerazuba, inzego zitandukanye zikorera mu Ntara n’abahagarariye imiryango y’abo bakozi.

 

Izindi wakunda

Bwiza.com
error: Alert: Ntabwo byemewe!!