bwiza.com
Ahabanza » Kwibuka25: Abarokotse Jenoside ba Gatsibo bahaye Perezida Kagame Inka y’ishimwe
INKURU TWABAHITIYEMO Kwibuka

Kwibuka25: Abarokotse Jenoside ba Gatsibo bahaye Perezida Kagame Inka y’ishimwe

Abavuka mu karere ka Gatsibo n’abahatuye bibutse Abatutsi bazize Jenoside yo muri mata 1994, bagaruka kuruhare Inkotanyi zagize ngo zirokore Abatutsi bari mu kaga ku isonga bashimira umukuru w’igihugu Perezida Paul Kagame ndetse bamugabira inka y’ishimwe.

Ni igikorwa cyabaye , aho imiryango ndetse nabavukiye i Gatsibo mu ntara yiburasirazuba, barangajwe imbere n’umuyobozi wabo basuye urwibutso rwa Kiziguro. Abibutswe kuri uyu munsi ni abahoze batuye mu mirenge ya Nyarubuye, kiziguro, Murambi, ndetse nabiciwe muri Paruwasi ya Kiziguro.

Igikorwa cyatangiye bibutswa insanganyamatsiko igira iti “Twibuke twiyubaka” umuhango watangijwe no gufata umunota wo kwibuka abazize Jenoside, banashyira indabo ku mva zishyinguyemo Abatutsi biciwe muri Paruwasi ya Kiziguro.

Umuyobozi wa Ibuka mu karere ka Gatsibo Sibomana Jean Nepo yashimiye cyane ingabo z’Inkotanyi zo zahagaritse jenoside kuko arizo zatumye bagihumeka umwuka w’abazima.”

Ati:”Ndashimira nyakubahwa Paul Kagame we n’ingabo yarayoboze za FPR Inkotanyi zahagaritse jenocide, iyo zititanga ubu natwe ntago tuba duhagaze aha ngaha, ndashimira kandi abaje kwifatanya n’akarere ka Gatsibo kwibuka abacu bishwe muri jenocide yakorewe Abatutsi muri mata 1994″

Yakomeje ashimira umukuru w’igihugu Perezida Paul Kagame, avuga ko nk’abacitse ku icumu bo mu karere ka Gatsibo, bazamuha inka y’ishimwe asaba abayobozi bari baraho ko uzamubona vuba yazamushyikiriza iyi nkuru iyi nka ikazataha vuba.

Gasana umuyobozi w’Akarere ka Gatsibo witabiriye ikigikorwa cyo kwibuka jenoside yakorewe abatutsi avuga ko kwibuka atari inzika, ahubwo ari ugusubiza agaciro abishwe bambuwe.

Ati: “kwibuka si inzika ahubwo ni ukwibuka twiyubaka bikaba n’uburyo bwiza bwo kurushaho guha agaciro abazize ubwoko bwabo kandi batarabuhisemo, abo ni abacu twabuze tukibakunze bazize uko bavutse bishwe urwagashinyaguro muri jenoside yakorewe abatutsi mureke tubibuke, ikivi cyabo tuzacyusa”

Umuyobozi w’Intara y’intara y’iburasirazuba Mufurukye Fred, avuga ko uyu munsi abanyarwanda bafite igihugu kibakunda bose, ko abarokotse bakomeza kwigirira ikizere cyo kubaho.

Agira ati”Abarokotse mwese nimuhumure, dufite igihugu kiyobowe na Nyakubahwa perezida wa Lepubulika Paul Kagame, wagize uruhare runini mu guharagira Jenoside yakorewe abatutsi muri Mata 1994, iyo bitaba ubutwari bwabo ntituba turi aha ngaha. ndagira ngo nsabe abanyarwanda cyane cyane urubyiruko kwibuka twiyubaka duharanira ko jenoside yakorewe abatutsi itazongera kubaho ukundi”

Igihe cyo kwibuka kibaho kugira ngo twige tumenye amateka mabi yaranze igihugu cy’u Rwanda kugira ngo ibyabaye ntibizongere kubaho ukundi.

Umunyamabanga wa leta muri minisiteri y’ubuzima Ndimubanzi Patrick wari umushyitsi mukuru yashimiye abahagaritse jeniside yakorewe abatusi, ashishikariza abanyarwanda kwimakaza umuco wa Ndi Umunyarwanda.

Agira:”nkomeje gushima FPR Inkotanyi yahagaritse jenoside, bakoze igikorwa cy’indashyikirwa nukuri Imana izabibahembere, ndasaba rero ko abanyarwanda twese turushaho kwibuka ariko tuniyubaka, ndetse duharanira ko Jenoside itazongera kubaho ukundi”.

Urwibutso rwa rwa Kiziguro rushyinguwemo imibiri 14,284 uyu munsi hashyinguwemo indi mibiri 17 yari itarashyingurwa mu cyubahiro.

Habumuremyi Viateur

Izindi wakunda

Bwiza.com
error: Alert: Ntabwo byemewe!!