bwiza.com
Ahabanza » Amakimbirane yahungabanyije ubukungu bw’Afurika mu myaka 20 ishize- IMF
Ubukungu

Amakimbirane yahungabanyije ubukungu bw’Afurika mu myaka 20 ishize- IMF

Ikigega mpuzamahanga cy’imari, IMF, kivuga ko amakimbirane mu bihugu byo muri Afurika yamunze ubukungu bw’uwo mugabane mu myaka 20 ishize. Ibyo bikaba bikubiye muri raporo cyatangaje ku wa 12 Mata, 2019 i Washington D.C muri America.

Iyi raporo, Sub Saharan Africa Regional Economic Outlook, yita ku bukungu mu gace kibanda kuri Afurika yo munsi y’ubutayu bwa Sahara, igaragaza ko amakimbirane yagize ingaruka ku baturage b’ibyo bihugu, akagira n’ingaruka mbi ku bukungu.

Ishimangira ko amakimbirane mu bihugu byo munsi y’ubutayu bwa Sahara yari ku kigero cyo hejuru n’ubwo ubukana n’imiterere byabaga bitandukanye bitewe n’igihe. Ibihugu byo muri ako gace byibasiriwe n’amakimbirane cyane cyane kuva mu 1990 kugeza 1999 byari 15. 35% by’ibihugu bigize ako gace.

Iyi raporo yerekana kandi ko n’ubwo hari igabanuka ry’amakimbirane mu mpera z’1990, agace ka Sahel n’agace gakikije ikiyaga cya Chad byibasiriwe n’ibikorwa bya Boko Haram n’indi mitwe y’iterabwoba ya Kiislamu.

Ikomeza ivuga ko mu bihugu bigize agace ka Sahel, Nigeria,Cmeroon,Chad na Niger, ari byo byahuye n’ibibazo bikomeye cyane kuva 2010 kugeza 2017. 77% by’imfu zaturutse ku makimbirane mu gace ka Sahel naho munsi y’ubutayu bwa Sahara imfu zikomoka ku makimbirane zari 40%.

IMF, ivuga ko ingaruka nyamukuru zari ukwimuka kw’abaturage zijyana n’ihungabana ry’ubukungu. Kuva mu mwaka w’1980, abaturage bimuka bashaka ubuhungiro bavuye kuri miliyoni 5 bagera kuri miliyoni 18 muri 2017.

Mu kiganiro n’itangazamakuru, umuyobozi w’icyo kigega, Abebe Selassie, yavuze ko abayobozi bo mu gace ka Sahel na Chad bakwiriye gufata ingamba zihutirwa zagabanya amakimbirane byihuse.

Yongeyeho ko ibyo bihugu bigomba gushyira imbere iterambere ry’ubukungu bugera kuri bose.

Icyo kigega kigaragaza kandi ko ntagihindutse abantu 9 mu 10 b’abanyafurika bashobora kuzaba ari abakene mu 2030.

Bizumuremyi Patrick @bwiza.com

Izindi wakunda

Bwiza.com
error: Ntibyemewe